مدونة عبد الله كريشانبحث

رمضان كريم

عبد الله حامد كريشان
رسم تعبيري لخاطرة «رمضان كريم»

على غير العادة أنا اليوم ميت من الجوع، مع إني تسحرت، صح ما أكلت من سحور العيله لأنه تمر وبيض بسويلي حرقه بس تسحرت، باقي نص ساعة عن المدفع، من الجوع قاعد بحوم في المطبخ أتشمشم، أمي شكلها مخلصه الطبخ يا إما ما بدها تطبخ، مبارح الخميس أجانا أكل كثير، الخميس يوم الفضيلة كل الجيران بتبادلوا صحون الأكل، أمي قاعده بتحشي القطايف، يمه خليلي حبه محشية بالجوز، بس يأذن بدي أكلها نية، وناوي كمان بعد التراويح أجيب عوامي من عند عبدالكريم… مالك اليوم يا شين؟ من وانت في الصف الأول بتصوم عمرك ما سويت هيك اعلامك الحين لما صرت في الرابع انثبرت! يله افطر وخلي عيال الحاره يتمسخروا عليك ويغنولك

يا مفطر رمضان

يا عايف دينه

كلبتنا السمرا

تجرجر مصارينه

لا يمه شو أفطر ما أفطر؟ أنا بتخوث عليكي… بتتخوث علي؟ أصمطك الحين على صباحك في الحفاية؟ اطلع انقلع العب في الحاره مع العيال يا روح عند المدفع ما ظل شي. منا قادر يمه لا ألعب ولا أطلع لساحة المدرسه عند المدفع .شفت امي بدها تعصب حليت عنها قبل ما تقوم ترطن تركي، طلعت وعند راس الشارع ارتكيت عالحيط وقعدت، قرنة بيتنا صايره وسط حارة البيارة، مشاوير مبارح هدت حيلي، مبارح كان يوم الفضيلة وكان دوري أوزع الصحون للقرايب والجيران، وزعت أكثر من خمس صحون ششبرك، حتى للطور رحت، صح صحلي كراوي بس انهلكت. عيال الحاره كلهم قاعدين بنططوا وبلعبوا وأنا حتى طاب يا عود وسبجي عالقاعد مثل الشياب منا قادر ألعب . يله قوم ظل عشر دقايق عن الاذان قالوا صحابي تعال معنا نطلع عند المدفع زي كل يوم نلم شرايط، كل ما كانت الشرايط والخرق كثيره صوت المدفع بكون أقوى، مبارح وصلن شرايط مدفع الدك لآخر الملعب، لا منا قايم روحوا انتو. راحوا.

حارتنا في رمضان يا محلاها وغير شكل وكل الحارات هيك، ما في أحلى من رمضان، ولما يجي رمضان في الربيع والصيف بكون أحلى وأحلى، في العادة الحاره ما شاء الله مليانه شاحنات لكن في رمضان لا شاحنات ولا مشاحنات، الحمد لله الوضع رايق، الكل مريح ومبسوط، رمضان كريم، بتصدقوا حتى الضراير في رمضان بصيرن صحبه بطبخن مع بعضهن وبوكلن مع بعضهن، اسألوني أنا أبوي ماخذ ثنتين، كمان كل سكان الحاره بصيروا ما شاء الله حبايب، كل اللي متزاعلين ومتحاربين في الحارة بتصالحوا في رمضان، العزايم بتكثر واللمات بتكثر حتى اللي مش أرحام بتجمعوا . أغلب سكان الحاره كل ليلة سهرانين مع بعض بتفرجوا على مسلسل غوار، صح النوم، حفظوا المسلسل عن غيب، إذا أردت أن تعرف ماذا في إيطاليا عليك أن تعرف ماذا في البرازيل. الجامع الكبير اللي ما كان يصلي فيه قبل رمضان غير سبعه ثمانيه من الختايره الحين الحمد لله مليان خصوصا في التراويح، صلاة التراويح أثابنا وأثابكم الله، حتى إمام الجامع مستغرب، بقول يمكن شياطينكوا يا جماعه من مردة الشياطين ما بتبينوا وما بنشوفكوا في الجامع غير في رمضان…

ما قال المؤذن الله… وقبل ما يكمل ويقول أكبر فقع المدفع وهز معان هز وكل عيال الحاره أجو من عند المدفع مثل الصواريخ وراهم عجاجه كل واحد على بيته بغنوا في صوت واحد طخ المدفع طخ طخ وأنا نطيت نط لحبة القطايف النيه… الشيخ على الطنطاوي منور بتكلم عالتلفزيون برنامجه اليومي الحلو على مائدة الافطار ومع إن الكل بحب الشيخ علي وبرنامجه لكن عليم الله ما في واحد مركز معه من الجوع، عند البطون غابت الذهون، بعد الفطور بختلف الوضع الكل مركز مع الراديو ومع الحزيره وبغنوا معه

حزيرة رمضان أحلى الحزازير

فكر فيها شويه ماهي صعبه كثير

والجائزه عيديه من رمضان كريم.

قراءة المنشور الأصلي على فيسبوك