مدونة عبد الله كريشانبحث

نسوان زمان

عبد الله حامد كريشان
رسم تعبيري لخاطرة «نسوان زمان»

كل ما بقرّب العيد وبشوف أطفال اليوم بتذكر طفولتنا زمان وأغنيتنا

بكرا العيد وبنعيد بنذبح بقرة سعيد

وسعيد ماله بقره بنذبح بنته الشقرا

والشقرا ما فيها دم بنذبح بنت العم.

وكيف كنا نحط هدوم العيد عند روسنا في الليل لما ننام حتى الصندل أجلكم الله بنحطه عند روسنا.

وبتذكر حالة الطواري القصوى اللي كانت تعلنها نسوان زمان من قبل العيد باسبوعين ويمكن أكثر، يعني لو بقدرن نسوان زمان يخلعن البلاط وينظفن من تحته قبل العيد ما بقولن لأ . يا اخوان بامانه مافي قرنه ولا زاويه ولا خزق في البيت إلا بتنظف ومش أي تنظيف، القزاز بتلمع، السقف بتعسف، الحيطان بتتليف، الخزاين والدروج بتتفرغ كلها وبتتنظف وبنعاد ترتيب الملابس فيها، المنام بنهد وبتنجد تقول منام عريس، البسط والفرش والسجاد بنكت (بتنفض) في الشارع

(روح نادي صحابك بس من اللي فيهم مروه مو مخوخين… وخذوا السجادات والبُسط والخدر وكتوهن في الشارع… كتوهن زي الناس)

طبعا شغلات كثير كانت تطلع من ظهورنا احنا العيال غير كت السجاد مثل التعسيف وتلميع الشبابيك، عيب النسوان يلمعن شبابيك…

بنرجع يا خوان للتعزيل، بعد التنظيف لازم كل أثاث البيت يتغير مكانه ويترتب ترتيب جديد، الخزاين لازم يتغير محلها تنزاح عند الحيط الثانية والتخت ينفك ويتركب هناك، كراسي الخشب لازم تندهن كماليكا حتى تلمع، ويمكن الأبواب كمان، إذا فيه قواطع في البيت لازم تتغير شراشفها، طبعا شراشف العيد بيضا مطرزه في أزرق بتكون مخبية في الشنته الحديد فوق الخزانه، حتى الشارع قدام باب البيت من برا لازم يتنظف وينرش بالمي، غرفة الضيوف لازم تكون على اخر طراز وعلى طاولة النص دلال القهوة والكعك والمعمول وسدر محطوط عليه باكيتات دخان من جميع الأشكال والألوان… هو إحنا تعلمنا التدخين من شويه… لكن الحمد لله على كبر اقلعنا.

بعد حملة التعزيل بظل يومين قبل العيد هذول للكعك والمعمول يعني بتشم ريحة العيد من الشارع الثاني.

بدك الصحيح نسوان زمان ما في منهن، الله يسعدهن نسوان زمان وكل النسوان اللي زي نسوان زمان.

قراءة المنشور الأصلي على فيسبوك