مدونة عبد الله كريشانبحث

يلله معي ع السوق يا وليدي

عبد الله حامد كريشان
رسم تعبيري لخاطرة «يلله معي ع السوق يا وليدي»

لازم ياجدك تظل ترافق الرجال… وتسمع كلامهم… وتتعلم خصالهم… اليوم احنا في الستينات وانا كبرت وبدك تساعدني في الدكان… بدي ناس يساعدني والبركة فيكو يا جدك… هذا هو يا جدك سوق معان… احنا التجار حوالى اربعين تاجر من جميع العشاير… التلهوني وابو طويلة والعقايلة والكراشين والصلاحات والمحتسب وابو رخية والشراري والشمري وعيال محمود والرواد. وغيرهم… كل العشاير في منهم تجار… من كل معان… من الطور ومن التحاتى ومن الشامية… ومن ضيوف معان… من هانا من هالمكان يا جدك من دوار البلدية لعند السرايا هذا هو سوق معان… زمان هذا السوق كان مبلط ومرصوف… الحمد لله يا جدك السوق طيب والبيع كثير والبركة موجوده ونعايم الله وفي موسم الحج بزيد البيع وبتزيد البركة… الحجاج بتجمعوا في المنزلة والمنزلة عند الجامع الكبير قريبة من السوق… احنا يا جدك في معان كلنا قلب واحد… هذي دكان ابو طويلة… وهناك دكان ابو عربي وجنبها دكان الشمري وفوق دكان الرواد ودكان المحتسب وابو رخية… وتحت دكان دوينع الخوالدة… كلنا اخوان ياجدك… وبنلتقي يومي في هالجامع اوقات الصلاة… هذا جامع قديم كثير بيوتنا وجوامعنا طين والطين يا جدك احسن ميت مره من هالاسمنت اللي طالع… وهذاك يا وليدي زقاق القناطر والمنطار… وهذي القهوة يا جدك اسمها قهوة درويش المكاوي للي بدو يشرب شاي أو يفطر أو يتغدى… وفي كمان قهوة عيسى سمندر للي بدهم يلعبوا طاولة… ولا يشربوا دخان… دير بالك يا جدك تشرب دخان… الدخان مو مليح…

كل هذي الجمال اللي شايفها يا جدك اجت امس من فلسطين جابوها تجار… محملي ومزملي… أكثر التجار اشتروا منها وانا كمان اشتريت… وفي قوافل غيرها بتجي كمان من الشام… شايف يا جدك كيف السوق عامر ومليان ناس؟ هذول اخوانا البدو والفلاحين جايين من القرى ومن البادية… جايبن بضاعتهم ببيعونا وبشتروا منا لوازمهم… ومرات بنتبادل معهم بدل… وهذيك الزرايب هناك… احنا يا جدك مخلينها الهم يربطوا فيها دوابهم ويأمنوا اغنامهم… هذول يا جدك طنايبنا يعني مثل اخوانا احنا واياهم الحال واحد…

النسوان يا جدك ما بنزلن عالسوق… عيب… لكن بشترن اغراضهن من عند البياعات… في عندنا أكثر من بياعة في معان بجيبن بضاعتهن من بره وببيعن في بيوتهن…

يلله يا جدك وصلنا ساعدني نفتح الدكان… دكان جدك الحج حسين كريشان… وان شاء الله يوم مبارك…

قراءة المنشور الأصلي على فيسبوك