رمضان جانا

قبل خمسين ستين سنه ما كنا في معان ولا حتى في الأردن كلها نعرف اشي اسمه زينة رمضان، حلوه الزينه ما قلنا شي، لكن جيلنا كانت زينته وطقوسه غير، في معان واحنا اطفال مثلا كنا نعرف ان رمضان قرب لما نشوفهم نصبوا مدفع رمضان في ساحة مدرسة معان الثانويه، المدفع مشهور الكل بعرفه، وبتوقع الجيل اللي قبلنا كانوا يشوفوه منصوب عند الشعار، كل اطفال معان كانوا يحبوا مدفع رمضان، اغلبهم شارك في جمع القماش والشرايط لدك وتجهيز المدفع، فرحتتا بالمدفع كانت مركبه، مثل فرحتنا هالايام بالكمائن المركبه اياها، كنا نفرح لما يطخ المدفع ونفرح واحنا بنركض ونتسابق كل واحد لبيته وفرحانين واحنا بنهتف طخ المدفع طخ طخ، وفرحانين واحنا رايحين للبيت نفطر… كنا نعرف ان رمضان جاي من أفران شوي القطايف لما يجهزوها قدام بعض الدكاكين قبل كم يوم، أفران اغلبها عالحطب والقطايف صب يدوي وريحته معبي الشارع، واللي بسوي العوامه بجهز قدام محله العده، وغيره وغيره، اما يوم التحري عن الهلال مثل اليوم كنا نشوف شيوخ معان الله يرحمهم يطلعوا على سطح الجامع الكبير بعضهم بحط طرف منديله البوال على عينه وهو براقب السما بحاولوا يشوفوا الهلال، وقتها كنا نقول خلص بكرا رمضان… ولما ببدأ رمضان ببدأ كل الخير وبتبدا البركات وبتبدا اللمات وببدأ التراحم… بتتذكروا يا ختايره الشيخ علي الطنطاوي الله يرحمه وبرنامجه على مائدة الإفطار؟ ومسلسل صح النوم ومقالب غوار في تلفزيون الحاره؟ وحزيرة رمضان احلى الحزازير فكر فيها شويه ما هي صعبه كثير؟ والمسلسل الإذاعي الف ليله وليله على إذاعة عمان…؟
لكن المغروس في وجداننا ووجدان الجيل صلاة التراويح وصوت الشيخ فهمي الله يرحمه الرخيم وقصائده في العشر الأواخر عطر اللهم قبره الشريف، ولا اوحش الله منك يا رمضان، وصوت الشيخ وحيد والشيخ عبيد الله يرحمهم، صلاة التراويح اثابنا واثابكم الله…
ومثل سبيل معان اليوم كانت عادة الفضيلة في رمضان زمان ولا زالت لما كل الجيران و القرايب يتبادلوا صحون الطعام
في مصر كمان صمنا و رمضان عندهم حلو خصوصا ايام الخميس على الجمعه في ساحة الحسين وزينات الاحياء الشعبية و الفوانيس والأطفال وحوي يا وحوي ورمضان جانا اهلا رمضان…
في الإمارات كمان لنا ذكريات مع رمضان والصيام وموائد الخير والصنادق لسهرات الشباب والشلق الفوتيش…
وابرك ذكريات الصيام لما صمنا الحمد لله في الحرم، اللهم تقبل وارزقنا العوده لنا وللسامعين
رمضان خير وبركة في كل زمان ومكان
مبارك علينا وعليكم الشهر الفضيل واعاننا الله واياكم على صيامه وقيامه وتقبله الله منا ومنكم اجمعين اللهم اجعلنا وأهلنا وذرياتنا في هذا الشهر الفضيل ممن قبلتهم و غفرت لهم ورحمتهم واعتقت رقابهم ورقاب والديهم من النار
كل عام وانتم بخير