قبرص…

كلما قالت مذيعة النشرة الجوية ان المنخفض قادم من قبرص أو متمركز فوقها… قالت الوالدة يا ويلنا!! من قبرص؟ والله غير تقبرص ع روسنا… الحقوا حالكوا هذي من قبرص…
وانا الحين بقول يا اخوان شكل المنخفض هاليومين من قبرص… والحقوا حالكوا لا يصير فيكوا مثل ما صار فيي ايام الكسا… وهاي الصوره تحت مبينة… تذكرتوا؟
منخفضات قبرص يا جماعة بدها استعدادات غير… بدها تتاكد ان البيت فيه عدس يكفي العيلة اسبوع… وكم ضمة فجل… الفجل كويس.ونص كيلو ذرة حب عشان البوشار… الكاز والغاز حسب شو بتدفوا… جريشة عشان الرشوف… طحين قمح لزوم الششبرك… واهل معان بجوز يفكروا في الرقاقة أو الروام (اكله قديمة شبيهة بالرقاقة)… اكلات قديمة… اذا فيه بالبيت فرن غاز للخبز والسمن البلدي ولبن الجميد متوفر… بنصح في المجلله… المجللة مع السمن البلدي بتدفي… لا تنسوا الشعرية لان اذا في عجوز في البيت اكيد الا تسوي شعرية وسكر… اما اذا عندكم صاج وخرابة فيا ريت تجربوا فطيرة السكر… بعني خبز عالصاج بنفت مع السمن والسكر ويمكن مع الحليب… أنا بصراحة بعرف اكل بس يعني لا تسالوني عن طريقة الصنع والله أكثر من قلي البيض ما بذكر اني سويت…
اذا انتو مدن وحضر ومن جماعة الهمبورجر… كمان بلزمكو تحتاطوا… جيبوا الخبز المدحبر وعبوا الفريزر من اللحم المثلج…
والجميع بدو أو حضر لازم ما يمر المنخفض بدون ما يسوو هريسة… ولا تنسوا الكستنا… كستنا تركية مش صينيه ملزقة في قشرها… وصحتين وعافية
المنخفضات يا جماعة عندنا في الأردن تعني مع العطلة…
كلوا واشربوا…