مدونة عبد الله كريشانبحث

زهقان…

عبد الله حامد كريشان
رسم تعبيري لخاطرة «زهقان…»

يا اخي شو اقولك؟! خليني ساكت احسن… ترى عايف حالي… يا عزيزي ما عاد في اشي يسر البال… كل شي انقلب فوق تحت… وكل شي تغير… حتى التلفزيون بتفتحه بتنغم وبتنهم بزيادة… ما في غير اخبار الحروب والقتل والسياسة الكذابة والمؤامرات… في البيت كمان بتلاقي كل واحد حاط راسه في تلفونه وما في واحد بتكلم مع الثاني… الحياة صارت كئيبة ومالها لا طعم ولا حلاوة… بصراحة حلاوة ايام زمان راحت وما في منها… كل شي اليوم خرب وتغير… العادات… الاخلاق… الناس… النفسيات… حتى البيوت والشوارع شكلها بغم البال البيوت الحين عبارة عن علب كبريت… وكل واحد مسكر جحره عليه ولابد… وسلامات يا جاري انت في دارك وانا في داري…

شوف أنا الحين مثلا زهقان وروحي طالعة… لكن تعال قولي وين ممكن اروح؟… ما في غير القهوة… وانا ما تعودت اقعد ع القهوة… وين هذيك الايام…؟ كل ليلة عندك برنامح… كل ليلة اما عندك ناس أو انت عند ناس… يوم جيرانك عندك ويوم انت عند اخوانك… أو انت والاسرة رايحين تتعللوا عند قرايب أو اصدقاء… ويوم كلكم رايحين بيت العيلة الكبير… ويوم انت سهران مع الربع والاصدقاء في المضافة… اقولك حتى عبارات التزاور والتواصل القديمة بطلنا نسمعها… بطلنا نسمع مثلا… يلله نروح بيت جدي… أو روح يا ولد نادي عمامك يفطروا… أو يابا بدهم اياك تروح تتعلل في الديوان… أنا شايف احسن شي يا صديقي نطبق المثل اللي بقول

:«ان كثرت همومك حط راسك ونام»

تصبحوا على خير

قراءة المنشور الأصلي على فيسبوك