مدونة عبد الله كريشانبحث

يا صباح يا فتاح…

عبد الله حامد كريشان
رسم تعبيري لخاطرة «يا صباح يا فتاح…»

يا اخوان كلمتي اليوم هذي بدي اكتبها باالعامية مش كره بالفصحى لا سمح الله… الفصحى لغة القرآن بنحبها وبنوقرها… لكن مرات بطلع الكلام بالعاميه لحالو… تاملوا معي يا اخوان حال صاحب المصلحة الخاصة صاحب الدكان مثلا وحال اخونا الموظف… صاحب الدكان من الفجر بصحى وبصلي وبشربله فنجان قهوه وبطلع من البيت وطول الطريق بتمتم… يا الله… يا رب… يا صباح يا فتاح… يا رزاق يا كريم… عليك توكلت يا رب ترزقنا وتبارك لنا… وبظل هيك طول الطريق… ومع فتح باب الدكان بعلا صوته في الذكر والدعاء… ياااا الله مالنا غيرك يا رب ترزقنا… الدكان الحمد لله ومليانة والبيع كويس… وبصبح على جاره بياع الخضره وبسلم على اللحام وعلى راعي البسطه… وبتحس انه مبسوووووط عالاخر… برتب بضاعته وبكتكتها… بطلع حامل الشبس بره والكراتين وبفتح ثلاجة الببسي وبطلع كياس الفحم والمكانس… وبفتح التلفزيون على محطة القرآن وبعده بقول يااااارب ياااا كريم…

المسخم الموظف… بكون سهران طول الليل عالدوري الاسباني أو الانجليزي وبيجي ينام عالوحدة ما بعرف بس يغطي راسه في الحرام بشوف وجه المدير… بستعيذ من الشيطان… بقلب عالجال الثاني بتذكر انه ما ظل في رصيده ولا يوم اجازه… بقول مو مشكلة هي جت ع رصيد الاجازات… برجع بقلب ع جاله الاولاني بتطلع صورة الرزنامه في وجهه اليوم 14 في الشهر… بعني باقي اسبوعين عن الراتب… استغفر الله العظيم… بقوم بتناول المحفظة من عند راسه… يا ناس قديش ظل فبها؟… بضوي الكهربا… بحاول يفتح المحفظة… ملعونة الحرسي… ملزقي في بعضها من قلة الاستخدام… هو عارف اللي فيها… نيرتين يا ثلاثي… بس بدو يتاكد… برجع بغطي راسه في الحرام هالمرة بتطلعله صورة الملقي واضحة عالاخر… اعوذ بالله من السعادين الحمر… قبل الفجر بغفى… البصمة عالثمانية والحين الساعة ثمانية وربع… انخصم اليوم… والبهدلة مضمونة… الكشرة في وجهو بتشق الحلق وبوزه شبرين لقدام… المراسل بقوله صباح الخير… برد شايفك طير من وجهي . اول مراجع والله لفش غلي فيه… يا اخي شو بدك والله منا شايف الفضا… روح لغيري… بصفط اديه عالطاولة وبرمي راسه فوقهم… يلله اليوم مخصوم مخصوم والبهدلة حاصله حاصلة… خ نكسبها نومه عالاقل… وببدا يشخر

قراءة المنشور الأصلي على فيسبوك