يمه… شو غدانا؟

زمان كان البيت بابه عالشارع… الباب الخشب ابو طقطيقة… بتتذكروه طبعا… اكيد وانتو زغار طقيتوا فيها على باب الجيران وشردتوا… هربتوا. السور خمس امتار… لكن لما بنفتح الباب البراني نفسك بتنفتح معاه… بتشوف الحوش المحترم الكبيير… والنافورة اللي في النص… ومعرش الدوالي… تبع قعدة شاي العصر… ومرات للبطيخة بعد ما تتشقح وتنحط عالزير حتى تبرد… ارضية الحوش شميمتو (اسمنت) خضرااا وناااعمة وبتلمع لمع مع كثر الشطف… وزي ما بقوله الواحد بشوف صورته عليها… على جناب الحوش تنك زريعة مصفوفة على لواح خشب على داير الحوش… ما كان في قواوير بلاستك. زريعة اشكال والوان بتنعش الروح… منثور… قرنفل… اضاليا… كالونيا… ورد شهري… خبيزة… قدسية… ثم السمكة… فنجان القاضي… عنبر… زنبق… وانواع غير ما بعرف اساميها…
الظهر مع ترويحة طلاب المدارس… من عند باب الحوش البراني شنتة الكتب بتنرمى وبتظل تتزحلق على الارض لما توصل باب المطبخ… الصرخة اليومية لكل واحد جاي الظهر من برا (يمااااا.،. شو غدانااا؟)… الاكل على جوع ما في احسن منه… وريحة الطبايخ اول غير… ازكى والها رونق… الغدا طبعا طبخة وحدة ما فيش غيرها… تغنوج هالايام عالاكل ممنوع… هظا بدو ماك… وهظاك بدو همبرجر… والبنت بدها كنتاكي أو بيتزا… والثانية بدها شاورما… كل هالحكي ما في منه زمان… وقولة هذي الاكله ما بحبها… ما كانت موجودة في القاموس بالمره… الاكل بنحط عالطبلية مرة وحدة وفي وقت واحد… والكل لازم يقعد مع بعض… واذا حابين افتح منافسكم على اكلات زمان ابشروا: ششبرك… فول على لبن… مقلوبة زهرة… مقلوبة فول… شوربا حامضة أو رشوف… مجدرة… منسف طبعا… فطيرة لحم… كبسة… صيادية سمك اذا ناس اجا من العقبة… مكمورة (بندورة ولحمة)… رز حامض… مجللة… ورق وكوسى مع لحمة… قلايات… مقالي… .الحلويات شعرية وسكر… فطيرة سكر… هريسة… خبز مقلي (قراص. لزاقيات)… وفي شغلات فردية مثل بسكوت وراحة… قضامه صفرة مطحونة في الهاون مع سكر… هذي الاخيرة اكيد ما بتعرفوها…
وبعد هالحكي يا جماعة… بكرا شو قررتوا تتغدوا؟