لا حايص… ولا لايص

من آذان الفجر الحياة بتدب في البيت… ما في نوم… اللي بتطلع عليهم الشمس وهم نايمين بصيروا معيارة في كل البلد… عيب شو بناموا للساعة سته؟! ويمكن بناتهم ما يتجوزن… وحتى اللي بدو ينام ما بعرف ينام… الصوت والحركة في كل البيت… وخبط الابواب… التكنيس من الصبح… طيب مش كنستن قبل النوم؟ واحنا كنا نايمين… يعني شو لزوم التكنيس من الفجر…؟! ما في… هاظا نظام وقانون… يلله انت قومي احلبي حليب الفطور… وانت روح فك الجديان اللي ربطتهن مبارح مشان ما يشربن كل الحليب… وبعد اختك ما تحلب الحليب طلع الغنم للراعي… يلله تأخرنا الشمس بدها تطلع… المنام بتعزل… كل واحد بعزل منامه… الفرشة بتقطع الظهر… صوف… واللحاف صوف… والغرفة بتتكنس ما بطلع في المكنسة ولا حثروبة… والحوش بتكنس… ويمكن باب الحوش كمان اذا ما في ناس في الشارع بتكنس… وبنرش مي… انت قوم غسل وجهك ودك البابور… مع الشروق بنحط الفطور… وكل واحد بروح يشوف شغله…
اسمع يا ولد حضرنا فطور عالسدر مع ابريق الشاي الكبير وكثرنا عليه سكر… خذه معك للعمال… في عمال بشتغلو في الشارع… واذا الزبال اجا نادوه خليه يفطر معهم…
بين العصر والمغرب… زيارات النسوان لبعض… كل ثنتين ثلاثة في تراويكهن (لبس النسوان زمان) رايحات مع بعض عند وحدة من الجارات… قبل المغرب كل وحدة بتكون راجعة لبيتها… وحبات السولفانة لاول عيل بلاقيها… لازم تكون شربت شاي واكلت بزر ويمكن كيك واخذت وهي طالعة حبتين سولفانة…
من بعد صلاة العشا الكل لابد في بيته… والشارع ما فيه لا حايص ولا لايص… وما في ولا دكان فاتح… بدك اغراضك اشتري من الصبح… النهار اله عيون… تلفزيونات ما في… وناس كثير ما وصلتهم الكهربا… هظا ابرك شي… ضو نمره اربعة… ماله؟! بجنن… واللوكس ابو شمبر مرفوع فوق النملية ما بتنزل غير للمناسبات… الليلة بدنا نتعلل…
وعالتسعة الكل بكون نايم…