فلنتاين

أمك وين يا ولد؟… يا ولد بقول أمك وين؟… لا حول ولا قوة الا بالله… شو هالجيل .!!.صار عمرك تسع سنين وحاسك بعدك عيل…! الله يرحم أيامنا ايام زمان. كان الواحد من خمس سنين يسرح في الغنم… ويحطب… ويمكن يذبح الذبيحة ويقطعها… شو هالجيل جيل اليوم؟! جيل مدلع وبايزز…!! بعدك كمان ما كملت حفر…؟!! طيب… امسك… امسك… ارمي الفاس من ايدك. وخذ حط الاغراض في المطبخ… معقول امك بعدها بتخبز…! أنا ذبحت… وطلعت من الخمسة… وشفتها بتزبل في الطابون… الساعة صارت سبعة…!! ا لكن هاظا أنا شايفها شاطفه الحوش. ومكنسه باب البيت… وراشة مي… كمان هظا هي ناشرة الغسيل… اسمع يا ولد… شوفها يمكن في القصيلة بتقطع نعنع للشاي… أو بلاش شوفها بجوز عند الغنم… لا… لا… هظا ابريق الحليب هيو مليان معناتو طعمت الغنم وحلبت وخلصت… طيب اسمع شوفها في الخرابة… عند الخم… بتطعم الجاج… كمان لا… هي هظول البيضات… شكلها جايبتهن من الفجر… ما شاء الله… خمس بيضات… الحمد لله… خير وبركة… اسمع يا ولد… أنا شام ريحة حطب… معقول كمان بتخبز عالصاج…!! خبز طابون… وخبز صاج…؟! الله يبيض وجهك يا بنت الحلال… هذي شكلها ناوية تسويلكوا فطيرة سكر… مع الفطور… يلله انبسطوا… روح… روح… دور عليها… يمكن تلاقيها في بيت القطع… اه… بيت القناطر… اللي فيه الخزين… يمكن بتعبي طحين في الكواير… قولها دشري كل اللي في ايدكي وتعالي بسرعة… ابوي ذبح اليوم ذبيحة عشان الضيوف… وهيو خلالكي الكرش والفوارغ. مشان تلحقي تنظفيها قبل ما تطبخي…
(ويسعدلي. الفلنتاين… واللي فلنتلوا…)