مدونة عبد الله كريشانبحث

يا بلعب… يا بخرب…

عبد الله حامد كريشان
رسم تعبيري لخاطرة «يا بلعب… يا بخرب…»

وين ما تلف وجهك زمان بتلاقي ساحة للعب… الساحات الفاضية أكثر من البيوت .ساحات بتنفع للعب الكره… وساحات للمزقر… وساحات للعب القلول. ولسيارات الاسلاك… وللدحلة… اما البسكليتات فبتقدر تسرح وتمرح فيها زي ما بدك… ما في سيارات تخرب عليك… كل وين وين لما تمر سيارة… يعني باختصار وين ما بدك بتلعب… حتى في خرابة البيت بتقدر تلعب… كل بيت كان فيه خرابة… والخرابة لحالها ملعب بتتسابق فبه الخيل… يعني انت واخوانك وقرايبك وعيال الحارة كلهم بتقدروا تلعبوا فيها طول النهار ولا حد بحس فيكو… اهل الحارة كلهم قرايب وحبايب والكل مطمن انه عياله في امان وما عليهم خوف…

في الخريف اللعب في الشمس غير شكل… الساعة عشرة الصبح مثلا بنتجمع في ساحة القلول… هذول بلعبوا قلول… وهذول بلعبوا سبع حجار… واثنين هناك بلعبوا حاب… والزغار كثير بلعبوا لحالهم… اما طمية أو كم ستير أو بلعبوا في بزر التمر… أو في الزرار… ومرات بلعبو اولك يا اسكندراني… والبنات الزغار بلعبن حاريدا باريدا… أو حجلة… أو شبرا امرا… الزلام الكبار كمان اللي بقعدوا كل يوم ع المصطبة… مرات بوقفوا يتفرجوا علينا… ومرة أو مرتين لعبوا معنا قلول لكن لعبهم غير اما احنا انبسطنا عالآخر.لما لعبوا معنا…

العصر ايام العطل اذا ما بنلاقي فطبول بنلعب مزقر… المزقر لعبة بنلعبها في طابة سبع جلود… بتشبه كثير لعبة الكريكت… اذا بدكوا بشرحها في التعليقات…

أكثر شي بنكد ع اللعب لما يشرف واحد كبير من الزعران المكروهين وبقول… لعبوني… يا بلعب يا بنكد… أو بقول با لعيب يا خريب… هانا بتتخربط الامور… طبعا مستحيل يلعب لانه كبير ولانه ازعر… واغلب الاوقات بتفرط اللعبة كلها وبنروح عالبيت… أو بتولع هوشة الها اول ما الها آخر… لغاية ما يجي زلمة من الكبار ويفك النشب ويتبهدل الازعر وينقلع… ونكمل اللعبة…

قراءة المنشور الأصلي على فيسبوك