مدونة عبد الله كريشانبحث

البياعة

عبد الله حامد كريشان
رسم تعبيري لخاطرة «البياعة»

كم مره بقولكوا يا شينين… لما اروح عند البياعة لا تلحقوني… هي مرة وحده في الشهر اللي بروحها… لويش بتلحقوني… كل شوي وواحد فيكو جاي… وبتطقوا ع باب المرة وانتو عارفين باب بيتها مشوار… لما توصل وتفتحلكوا… قطعتوا نفسها وقطمتوا رجليها… ما عندها ناس يفتح الباب… فضحتوني وجهي صار قدام المره قد الملعقة. بعدين شو اللي بدكوا اياه؟!.اختكوا الكبيرة عندكوا. وأكلكوا جاهز… بس العاده يا سعاده… عادتكوا ما بتغيروها… المهم… خذوا هذي الكياس حطوها جوا… ترى ما جبت غير هظول… النسوان ما خلن بضاعة… تفاعطنها تفيعط… تقول انها ابلاش… شو هاظا…؟! شكلهن عارفات انها مبارح جابت البضاعة… هجمن هجوم… ما بدري لويش هيك…! البلد فيها ثلاث بياعات… ما بحلالهن يشترن الا من عند بياعتي.!! وكمان في تاجر شنتة بلف على البيوت كل يوم ومعه بضاعة اشكال والوان… وبدين… لكن ما بشبعن… الله يساعد جيزانهن…

بس والله هالبياعات نعمة من ربنا للنسوان… لو ما في بياعات كيف بدنا نسوي… عالسوق ما بننزل… وعمان بعيده… والشام بس لجهاز العرايس… يلله الحمد لله. الله جابنا هالبياعة… وارملة… ما عندها ناس… بنوخذ راحتنا عالآخر… وبضاعتها كمان كويسة واسعارها رخيصة… وبتضيفنا يا فنجان قهوة… يا كاسة شاي… ما بتقصر… واهم شي انها بتصبر علينا… اغلب الوقت بنشتري منها عالدفتر… يعني دين… بس بنسدها… ما بنخلي علينا دين… مو مثل اللي بشترن وبطنشن…

يمه… مشان الله خلص فهمنا… والله يعطيك العافية… المهم شو اشترتينا؟… اشتريتلكوا كل خير…

قراءة المنشور الأصلي على فيسبوك