الداية

اللي انولد منكو في الخمسينات أو في الستينات أو حتى في بداية السبعينات… بتكون اللي ولدته عالاكيد الدايه… وواحد من اخوانه راح ركاض يناديها ولعلمكوا يا جماعة الخير. نسوان زمان ما بتعرف انها حامل وما بتحس فيها… الا وهي بتولد… لا مراجعات… ولا دكتورات… ولا سجل طبي… ولا كل اسبوعين عندي موعد… ولا صور تلفزيونية والترا صاوند يبين جنس المولود من الشهر الرابع وكل زيارة سي دي شكل… ولا بتشوف عشرين باكيت حبوب فيفول وفيتامينات في كل مكان في البيت حتى ما ينقص عندها الحديد ولا بتكون في اول ثلاث شهور حالة مرضية… والبيت كله طواري. ويمكن الجيران كمان. وكل شوي. اشي بتستفرغ واشي بتدوخ وبتيجي توقع واشي ماشية ماسكة ظهرها بايديها الثنتين… واشي بدها امها… واشي بدها اختها… واشي بتتوحم على كستنا في الصيف… أو على كرز اخضر حامض في الشتا… ولا في اشي من هالسوالف هذي كلها…
المهم ان الدايه اول ما توصل… ومن عند باب البيت البراني بتقول سخنتوا مي؟ (أنا بصراحة للحين ما بعرف شو سر هالمي!!)… وطبعا كل المناولات للدايه بتكون من ورا الباب… وممنوع الاقتراب… ولا حتى الزغار مسموحلهم يقربوا… والزلمه مسكين بكون هناك في الشارع… رايح جاي رايح جاي… ونازل عليه الايمان الشديد فجاة… وبدعي بحرارة… يا ربي ولد… يا ربي ولد… وام الولادة حماته معصبه… وكل شوي بتطلع توصي الاولاد… اوعوا واحد فيكو يجيب سيره انها بتتولد… بعدين بتتعسر… وطبعا اول ما تدخل الدايه عطول بتسمع الواااععع… يعني المولود شرف… والزلمه بتكون ايده عالفرد اول ما تقوله مبروك ولد بفرغ ال 16 طلقة. واقرب ولد على غرفة الولادة بتعطيه الداية شغلة بتقوله روح ادفنها في التراب… وبتقول للزلمه اذا عندكوا معزه والده جديد جيبولي من حليبها… واللي بكون المولود اخوه أو اخته… اكيد بكون سمع جدة المولود وهي كل يوم الصبح بتقول جيبو ملح بدنا نملحه كمان… ولفنه ومقطوه بالمقاط كويس… المقاط هاظا مثل الحزام بعد ما يلفن المولود ع قد ما الله اعطاهن عزم ويخلنه مثل حبة ورق الدوالي بربطنه تربيط بالمقاط… قال مشان يطلع الولد كرب…
ومن ثاني يوم بتشوف حبال الغسيل من هانااا لهناااك… كلها شرايط بيضا… طبعا بتعرفوها… بامبرز زمان…