مدونة عبد الله كريشانبحث

على المصطبة…

عبد الله حامد كريشان
رسم تعبيري لخاطرة «على المصطبة…»

السلام عليكم… ما شاء الله متجمعين! كل يوم أنا اللي بسبق. من بعد العصر وبقربز لحالي عالمصطبة لحد ما تشرفوا… اليوم شايفكوا سابقيني… يلله كويس… حط يا ولد ابريق الشاي وصينية الكاسات… بس اول شي خلي الشاي بخدر مليح… وبعدين حط النعنع… وبعدين صب… ترى اعمامك شريبت شاي بنعنع مزبوط. اليوم كمان جبتلكوا معي مراكي تستركوا عليها… وجايب معي سواليف غير شكل… ومن الآخر… حط… حط يابوك المراكي لعمامك… اه كل اثنين حط بينهم مركى… هذول شيوخ البلد… ما شاء الله منورين… منو اللي بدخن شعر البنات؟ ريحته بتهفهف… مو زي الهيشي بخنق… يا بوك بس توزع الشاي روح تناول دفتر اتومان من الدكان خليني الف سيكاره من عمك… مبين هالدخانات جاياتو من الشام… أنا الهيشي واللولو قطعوا نفسي…

سمعتوا يا ناس اخبار مبارح؟ بقولوا بدهم يشيلوا نيكسون من الحكم…!! اه تبع اميركا… قال مسوي فضيحة!! الله لا بجبروا… بالكوا شو مسوي…؟. طيب شو هي الفضيحة بدي افهم… يخرب بيته… فضيحة مره وحده…؟!! بقولوا وحده اسمها جرجيت… ما بدري مورجيت… ما بعرف اساميهم… ترى ما بستحوا هذول ولا بخجلوا… يمكن ناط ع بيت الجيران… ولا من هي هذي جورجيت…؟ شو؟ وترجيت؟ أنا شو بعرفني… اشوف افتحوا الراديو. بتسمعوا لحالكوا… الحين اكيد بجيبوا في الاخبار… والله يا جماعة شايف سولافتي ما عجبتكوا…

طيب اسمعوا بقولوا هظا اللي بتكلم في الراديو قال بدنا نصير نشوفوا.!! بتصدقوا هالحكي؟! يعني بتطلع صورته قدامك…!! مش بس هيك… بقولوا التلفون كمان بدو يصير قد بكيت الدخان… وكمان تصير تشوف اللي بتكلم معك!!! اه… اي مو معقول!! زودوها كثير…! بعدين هو احنا هبل نصدق هالحكي…

جبت يا ولد دفتر الاتومان؟ اه مليح… هات… قديش باعك اياه؟ شووو؟ قرش ونص؟ الله اكبر… يا اخوان ولعت الدنيا… وكل شي صار نار… بقولوا كمان نص رطل السكر بدو يصير بخمس قروش…!!!

قراءة المنشور الأصلي على فيسبوك