مدونة عبد الله كريشانبحث

الديوان

عبد الله حامد كريشان
رسم تعبيري لخاطرة «الديوان»

زمان كل بيت كان فيه غرفة كبيرة اسمها غرفة الضيوف… وناس كان بسميها الديوان… أو المضافة… زلام الحي أو الشارع كلهم كانوا متعودين كل ليلة يسهروا ويتعللوا عند بعض ومع بعض… البيوت ع طول مفتوحة للضيوف… ما في مواعيد ولا تلفونات… ولا لازم نعطي خبر قبل ما نروح… الباب بندق… وتفضلوا الله حي الضيوف… الله حي من جانا تفضلوا ع الديوان المضافة مفتوحة… اذا كانت المضافة قريبة من الباب البراني الخارجي بكون الباب البراني مفتوح والضيوف مافي داعي يدقوا عالباب بدخلوا ع طول… القهوة السادة عامرة… وبرقان الشاي رايحة جاية… في الصيف البطيخة بتتشقح… والتبريد فوق الزير… سهرات رمضان… قطايف وعوامة… ورز بحليب… السواليف متنوعة… عن الجو… عن الزرع… عن الموسم… عن المطر… عن الجار اللي زوج ابنه… وعن حجاج السنة… عن ابو فلان المريض وترتيب زيارته… مرات بتكون السواليف عن الحرب… عن الجيش ولازم عن فلسطين… مرات بفتحوا الراديوا اللي على الرف… خصوصا اذا كان وقت برنامج مع شعراء البادية… أو اغاني سلوى… عبده موسى… أو سميرة توفيق…

الناس كثرت… والمضافة بطلت توسع… ديوان العشيرة صار لازم… كل عشيرة صارلها ديوان… وديوان العشيرة بيت كبير… قاعة كبيرة… مقاعد ومراكي عالداير… مطبخ وحمامات ولوازم كاملة… بنفتح الديوان بس في المناسبات… في الاعياد… في الاعراس… وفي الانتخابات… كبرت العشيرة وبطل ديوان العشيرة يكفي… صار لكل فخذ ديوان… المهم ظل في مكان يجتمع فيه الاهل والاصدقاء ولو بس في المناسبات

قراءة المنشور الأصلي على فيسبوك