البيت طين لكن الشرشف أبيض أبيض

قلت لحفيدتي
ما كان عندنا مكيفات ولا سيارات وما كان في تلفونات ولا تلفزيونات… وما كان في مولات ولا خدامات… ولا نت ولا انتركمات… كنا كل يوم نصحى من الفجر على صوت الديك… والخرابة كانت ملعبنا اللي بنحبه… واسعة وكبيرة وبتطارد فيها الخيل… وفعلا بعضها كان فيه خيل… وكان فيها غنم وبعض الناس خرابتهم كان فيها جمال… يعني نعايم الله… إذا اجاك ضيف بتنبسط وما بتتنكد لأنك بتقوم بواجبه بدون ما تطلع من بيتك… فطورنا الصبح كمان كله كان من البيت… حليب… وبيض وجبنة ومعقود… والخبز طالع من الطابون ريحته بتفتح النفس…
في بيت القناطر أو بيت القطع يعني بيت الطين… في عز الصيف ما بتحتاج حتى مروحة… وفي كانون دافي… شوية جمرات في المنقل بس مشان تحمس عليهن القهوة أو تقحمش عليهن الخبزات…
في بيت الطين ما في كنبايات من عند آشلي ولا كورنر من عند الشهوان… ما في غير قاطع مبنى من الطين زي المصطبة وفوقه جنبية لكن الشرشف عليها ابيض ابيض مثل قلوب كل الناس هذيك الأيام… وريحة البخور الهندي معبية البيت…
حفيدتي سحبتني من ايدي وقالت يللا ياجدو خلص شحنت التاب وجبت بطاقة الألعاب يللا وديني عالمول…