مدونة عبد الله كريشانبحث

أيدي بتحكني

عبد الله حامد كريشان
رسم تعبيري لخاطرة «أيدي بتحكني»

الحمد لله… اللهم ديم هالنعمة واحفظها من الزوال… خلص اذا شبعتوا يا ولاد. قولوا الحمد لله… وارفعوا الطبلية… وودوا الصحون للمطبخ… وانت يا مدامتي يا بركتنا الله يعطيك العافية على هالقلاية وتسلم ايدك على صحن البيض… شكلو مقلي بالسمن البلدي… والطبخ زي ما بقولوا نفس… وانت نفسك طيب… الجمعة الجاية اذا ظلينا عايشين… بدنا فطور مثل هيك… بس بدنا الخبز يكون عالصاج… اشتقنا لخبز الشراك… كمن شراكية قمح… جاي ع بالنا فتة بالسمن… والسكر… مالك ساكتة؟! مش عوايدك!! في اشي مزعلك على هالصبح؟

- لا والله ما في شي… بس عيني من الصبح… بترف… وانا لما عيني بترف… بتوقع مصيبة…

- وحدي الله يا بنت الحلال… شو بترف ما بترف انت بتصدقي هالخرافات عيني بترف… والحفاية مقلوبة… والمقص مفتوح… وما بجوز الغسيل يوم الاثنين… ومو مليح تكنسوا البيت المغرب… ولا تكبوا مي في الليل… ولا تفخج يا ولد فوق اخوك النايم… كل هالسوالف أنا ما بصدقها… كلها خرافات… ومش صحيحة…

- لا… كيف مش صحيحة؟! بقولك اني مجربيتها… وكل نسوان الحارة مجربات مثلي… بس قول الله يعدي هاليوم على خير… ترى عيني بعدها بترف…

- اسمعي هالقصة… جارنا سواق التكسي سولفلي انه مبارح الصبح وهو طالع يشتغل… قايل لمرته ان ايده اليسار بتحكه قالت مرته ممتاز ممتاز… هاظا بدك تقبض مصاري كثير… اوعك ما تعطيني منها… بقول الزلمه لسا ما مشيت عشرين متر في السيارة… انطسيت مخالفة وانحجزت الرخص كلها… وبنشر العجل…

قراءة المنشور الأصلي على فيسبوك