والله مافي داعي…

" والله مافي داعي… "بعد الغدا تمدد… حاول ينام… تقلب يمين… يسار… غير المخدة… لكن بدون فايده… دايما بعد الغدا بنام ع طول… مرات ساعة… مرات نص… اليوم ولا دقيقة… البال مشغول… مالك يا حج…؟! قالت الحجة وهي بتحط قدامه صينية الشاي… - لا ما في شي… بس مش عارف انام… وانت الله يعطيك العافية… شايفك مسوي سلف ابريق شاي اكيد لاحظتي اني ما نمت… استند… ولع سيكاره… خذي الشرشف… وسكري باب الغرفة وتعالي… صب كاستين شاي… اسمعي… ما دام ما في ناس من الاولاد… بدي اسولف معك… ترى الولد ابنك… طيب يا ستي ابننا… من سنة وهو بلمحلي بدو يتجوز… والصراحة أنا كمان بقول لازم نخطبله صار عمره 27 سنة… وشغله الحمد لله كويس… بقدر يفتح بيت… واحنا الحمد لله ربنا ساترها معنا مش محتاجين منه شي… اسمعي… بقولوا عند ابو فلان جارنا بنت مرتبة وما شاء الله عليها… وهذول ناس الكل بعرفهم… سمعتهم في البلد مثل المسك وفي حالهم والكل بحترمهم وبناتهم بتاخذن… روحي انت والحجه شوفن البنت… وانا متأكد انها بتعجبكن وبتعجب العريس… خلوا امها توخذلنا موعد نروح كلنا عندهم وبدنا العريس يكون معنا… من حقه كمان يشوف البنت حسب الشرع والدين… واذا صار نصيب ضروري بدنا نتفق معهم ان الصفاح يكون محدود عالاخر… اه الخطبة يعني… بطلت تعرفي كلامنا!! أنا بعرف ابوها زلمه متواضع وما بحب الفخفخة ولا البهرجة… وانا كمان بقول ما في داعي للمظاهر وما في داعي لكل اللي بصير هالايام… في ناس بتفاخروا في كبر الجاهة… وبجرجروا كل البلد… بس عشان الناس يقولوا… والله ابو العريس جايب جاهة من هانا… لهناك… أو ينقال راحت لابو العروس جاهة كلها وزرا وشيوخ واعيان ونواب… وضباط و… و… بدي نسايبنا يعرفوا اذا صار نصيب اني ما عندي هالسوالف كلها ولا بحبها… بروح أنا واثنين ثلاثة بس من عيلتنا… وهم كمان بنوصيهم تكون محدودة على عيلتهم…… وصلى الله وبارك… وربنا يبارك للجميع ويتمم على خير… ع ح ك