خارطة… وشيخ مغربي…

" خارطة… وشيخ مغربي…"ارزاق… ما أكثرهم اللي بدوروا عالذهب… لكن قديش عددهم اللي افلحوا؟! حتى اللي شنصت معهم ولقو… ما بسولفوا ولا بحكوا… الناس بس بتخمن تخمين لما بشوفوا العز اللي نزل عليهم فجاة… يعني كل واحد كان مسخم وعايف حاله… لما فجأة ببدا يلعب بالمصاري لعب… وبكشخ… وبركب مرسيدس غواصة بعد نمره 11… وحذا ابو اصبع… الناس بقولوا يا اما لقى ذهب يا تاجر بالمخدرات… ما في غير هيك… أنا شخصيا عمري ما فكرت ادور عالذهب… لكن بحب اسولف مع المغامرين… واسمع نوادرهم وقصصهم… واحد مثلا قالي صارلي عشرين سنة بدور ما خليت خزق في الأردن وما دورت فيه وبعت اللي فوقي واللي تحتي وانا بدور… قلتله طيب لقيت؟ قال بالله عليك هذا سؤال بنسأل؟! هذي خلقة واحد ملاقي ذهب…؟! بعدين لو ملاقي ذهب بقعد اسولف معك؟!… واحد ثاني قال نعم أنا لقيت… الجهاز اللي كنا بندور فيه كان يرن… لما نحفر… يا اما يطلعلنا جماجم ميتين… يا بطلعلنا بصاطير جبش… واحد من المغامرين القدامى… قال جبنا مره بجهد جهيد شيخ مغربي… وجبنا وصفه غير شكل وخارطة… واضرب واطرح… وكان لازم الشيخ بعزم على زلمه من المشاركين ويقرا عليه وكانت الدنيا شتا وبرد… والغرفة مسكرة… وفيها صوبة بواري ديزل من صوبات زمان… قال الشيخ للزلمه… لما اقرا عليك رح تطير… قال كيف بدي اطير؟ ومنبن بدي اطلع والغرفة مسكرة؟!! قال الشيخ بطلعك من بواري الصوبه… المهم لما توصل لمحل الذهب وصفلنا الموقع كويس… ظل الشيخ طول الليل بحرق من هالبخور ويعزم ويقرا… ويرفع صوته… والزلمه اللي بقرا عليه الشيخ ما نطق ولا حرف… لما عجز الشيخ وخلص… سالوا الزلمة… ليش ما وصفت الموقع…؟! قال لما طرت من بواري الصوبة لزقت في الإتش H ما عرفت من اي جهة اروح ع ح ك