هذي والله الساعة المباركة…

أبشركوا يا أولاد… جدتكوا الحمد لله… وافقت اخيرا تقعد عندنا كم يوم… الكبار يا أولاد ما بحبوا يطلعوا من بيوتهم بالمره… حياتهم وراحتهم ومتعتهم بيوتهم… وزريعتهم… وقعداتهم… بحبوا الناس تروح عندهم… لكن ما بحبوا هم يطلعوا… طبعا أنا بعرف انكوا بتحبوها كثير… مثل ما هي بتحبكوا… وبعرف قديش بتحبوا قعدتها وسواليفها وقصصها… قصص زمان الحلوة… وبعرف كمان ان ما فيكوا حد بقصر معها ولا مع أي حد من ارحامكم . هذا طبعا واجبنا الديني… أنا يا اولادي حبيت أنبه على بعض الشغلات يمكن ما تنتبهولها… الكبار يا اولادي دايما محتاجين معاملة خاصة محتاجين الحب والاحترام والتقدير… لانهم بعرفوا الواجب… وبدهم كمان اللي بتعامل معهم يعرف الواجب مثلهم… يعني لازم كلنا نضحك في وجهها… نرحب فيها… ما نتركها تقعد لحالها… نسولف معها… نسويلها الاكلات اللي بتحبها… نهتم فيها ونكرمها آخر كرم… نعزم عليها مثلا في الأكل… يعني لما تقوم عن الأكل لازم نحلف عليها… نقولها والله غير توكلي… بالله عليك كملي… عشان خاطرنا كلي كمان… ومثل هيك… كل يوم الصبح لازم نبوس ايديها… هذي البوسة عند ربنا عظيمة… واكيد بصحلكوا من وراها دعوة خير… الله يرضى عليكوا… الله يرزقكوا… الله يحميكوا… وهالكلام الطيب اللي اغلى من الذهب… لما بدها تقوم تمشي لازم نمسك ايدها حتى لو ما بتحتاج ناس يمسكها… لما بتتكلم لازم نسمع شو بتحكي ولازم ما نقاطعها… واوعوا تتهاوشوا قدامها… أو ترفعوا صوتكوا على بعض… المكان اللي بتقعد فيه وبتنام فيه لازم يكون نظيف كثير… ومرتب ومعطر… فراشها كمان لازم يكون دايما نظيف ومعطر… كل الكبار بحبوا النظافة والنظام والترتيب… بعدين في شغلة بدي تديروا بالكوا الها… لو اي واحد فيكوا زعلان من اي شي برا… لازم ما يبين انه زعلان وما يكشر قدامها لان الكبار حساسين كثير… واذا بدها تروح ما نخليها تروح ونمسك فيها ونترجاها تقعد كمان…
الامهات و الجدات والكبار في السن كلهم يا اولادي نعمة من ربنا انعمها علينا اذا قدرناها كويس وعرفنا كيف نتعامل معهم ونبرهم… ونسعدهم… ونرضيهم… وكمان حتى اولادنا بعدين لما نكبر ببرونا… وأهم شي في هالموضوع… ان ربنا من فوق برضى عنا…
ويا هلا يمه… هذي والله الساعة المباركة… وهاتي ايدك أبوسها