جيبلنا علبة لبن

مدير البنك بنفسه طلع معه لعند الباب… وطلب من الموظف يحط الشنته في صندوق اللوموزين… يا باشا هذي الفلوس صارت في صندوق السيارة… الشنتة فيها مليونين كاش… أنا صحيح تضايقت انك سحبت هالمبلغ الكبير لكن البركة في باقي حسابك… ما شاء الله لسا فيه ثمان واربعين مليون… الله يزيدك من نعيمه… في امان الله يا باشا… شرفتنا… الشوفير ظل فاتحله باب السياره ولما ركب الباشا وقعد… سكر الباب… الشوفير لف وشغل السيارة… وهو جعص عالآخر… وولع سيكار كوبي اجاله هدية من مسؤول كبير… بلش يفكر… يتستعيد الذكريات… شغل شريط حياته كله… كيف جمع هالثروة في عشر سنين…؟!! حدث نفسه… الحمد لله أنا ما اختلست… ولا سرقت… ولا تاجرت في المخدرات… ولا غسلت اموال… كل ثروتي جمعتها بتعبي وبعرق جبيني… كنت موظف كحيان راتبي يوم ثلاثة بالشهر ما بظل منه تعريفة… تركت الوظيفة… واشتغلت في التجارة… جمعت اول الف… وسعت تجارتي… والالف جاب آلاف… وسنة ورا سنه سكرت اول مليون… اشتريت ثلاث قطع اراضي… وانا اشتريت من هانا وتولع الاراضي من هانا… والارض اللي بمليون جابت مليونين… اللي بحبولي الخير نصحوني اعدد مصادر الدخل… وانوع تجارتي… فتحت شركة استيراد وتصدير… وشركة للنقليات… وشركة سياحية… وشركة اجهزة طبية… وبلاش تعرفوا كل شركاتي… ترى في ناس بتحسد… أنا هالايام مش قادر احك راسي… ما عندي وقت بالمره… مشغول ومش ملحق… تذكرت بيت شعر زمان جدي الله يرحمه كان يردده يقول
صاحب المال تعبان… والفقري يا عذابه
قلت فعلا… لكن يا عمي وين كنا… ووين صرنا… الاولاد كانوا يتمرمطوا لما يوصلوا للمدرسه… ومدارس الحكومة الصف في ستين طالب… الحين صاروا في ارقى مدرسة خاصة والباص بوصلهم لحد البيت… وكاشخين كل يوم لبس شكل…
المره كانت عايفه حالها من شغل البيت الحين عندها شغالة ومربية اطفال وطباخة… والذهب مهي عارفة وين تحطه… الشقة اللي كنا فيها الرطوبة ماكليتها اكل… الحين فيلا وحديقة ومسبح…
- هيه… يا لاقي خير… اسم الله عليك… شو بتهذرم؟ شو فيلا؟ وشو حديقة؟ وايش المسبح هاظا؟! قوم قوم… مالك نايم وانت قاعد… روح جيبلنا ربطة خبز وعلبة لبن… سوينا مفركة بطاطا وبيض الحين بتبرد