بيت العيلة

صح يا بنيتي عمرك بس 14… وصح وقفناك فوق تنكة ولبسناك فسطان طويل حتى الشيخ يشوفك كبيرة ويرضى يكتب كتابك… لكن كل بنات جيلك جيل الستينات هيك… واحنا كانوا يجوزونا ازغر من هيك… بعرف وانا امك انك مربية كويس وبتعرفي كل شي بس لازم كمان اوصيك… بعد كم يوم عرسك بتتركينا… وبتروحي بيت جوزك… بيت العيلة… انت وجوزك الكو بس غرفة في البيت الكبير .كل اخوان جوزك الكبار ساكنين في نفس البيت كل واحد في غرفة هو ومرته وعياله… وعمك ونسوانه الثلاثة كمان في البيت… والبيت كبير… والحوش كبير… ومعروف عند كل الناس ان العروس الجديدة بدها تشهد على اصلها والكل بدو يشغلها ويختبرها… ويشوف شطارتها ونشاطها وادبها… واكيد سلافاتها نسوان اخوان جوزها اكيد غير يشتغلن فيها ويوقعنها في جور اشكال والوان حتى كل وحدة تبين انها كانت احسن وحدة اجت لبيت العيلة… بدك وانا امك تنتبهي وتبيضي وجه ابوك ووجوه اخوانك ووجوهنا كلنا… عمك ابو جوزك بدك تحترميه وعمتك كمان حطوهم على راسك من فوق شو ما عملوا فيك… هذول هم ابوك وامك… وترى عمك بعزم عزايم كبيرة كثير… بدك تكوني نار في الشغل… من الفجر لازم تكوني صاحية… بدك تحترمي جوزك وتحطيه في عيونك… وتحترمي كمان اخوانه وخواته وتسوي اللي عليك… وانت عارفة ابوك… بنات تزعل وتطلع من بيت جوزها وترجع بيت ابوها ما في عنده… ديري بالك تجينا زعلانه… من شعرك ابوك بجركي وبرجعك لبيت جوزك… حطي في اذانك وحده طين ووحده عجين… شو ما سمعت سوي حالك ما سمعت شي… قيل وقال ونقل كلام اوعي… بيضي وجوهنا الله يبيض وجهك وكلها كم سنة زمان وبتجي لبيت العيلة عروس جديدة وبترتاحي انت…
سامعي اولاد الحارة شو بعلقوا على اخوانك وبغنو حتى يجاكروهم
خيتو يا خيتو… طلعت من ديتو… يا صبابت ميتو…