اذهن تتكرفت

اول مره في حياته بدخل هالبلد… سمع عنها كثير… لكن عمره ما زارها… اليوم جاي يلبي دعوة صديقه القديم وزميله في الجامعة… مبسوط كثير لان الكل برحب فيه وببتسم في وجهه وكانهم بعرفوه من زمان… المعزب عازم ع شرف الضيف جماعه… كلهم من البلد بس هو جاي من برا… معظم الحضور بوجهوله حديثهم من باب الاحترام… لكن نص كلامهم هو مش فاهمه… بهز راسه وبوزع ابتسامات ع اساس انه فاهم كل شي… فضل انه يظل ساكت لعدة اسباب… لهجته غير لهجتهم… ويمكن اذا تكلم يطلع كلامه ناعم كثيبير… بالنسبة للفقع اللي سامعه منهم… كلهم بهدروا هدر… تقول مركبين مظخمات صوت.! المهم انحط الاكل… وكل اللي واقفين معه عالسدر كانوا يفتوا اللحم اللي قدامهم ويحطوه قدامه من باب اكرام الضيف…… وكل شوي بسمعوه كلمات ترحيب… وهو مسكين بهز راسه وبتبسم بدون ما يفتح ثمه لانه بوكل… عيب يتكلم والاكل في ثمه… بعد ما شربوا الساده وشربوا شاي بنعنع… المعازيم كلهم روحوا… وعند الباب اللي بسلم بقول… خلف الله عليكوا… عمار… الله يوسع عليكوا… كل واحد قال عبارة شكل. ظل هو والمعزب… قال المعزب يلله بدي الففك في البلد تتفرج وبعدين نمر على الورشه تبعتي حتى تشوف بيتي اللي ببني فيه… لفوا كثير… كل شي شافه في الجوله عجبه… الطبيعة… الجو… السوق… البضاعة الغريبة… لبس الناس… البيوت القديمة… البساتين والبيارات… اخيرا وصلوا للورشه… كان فيها عمال ومعلمين الكل بشتغل وبفاغروا ع بعض مفاغرة… سلموا… ووقف هو جنب صديقه المعزب… وارخى اذانه… بحاول يفهم بس لو كلمة وحده… سمع المعلم بقول لواحد من العمال
«يه!!… اخص اعلامك يا شين…!! يا مالي الثبرة اللي تثبرك… لوي ناطل هيك… كود صيب اللي يرقعك… اشو اكرب حالك… البين صامطك صمط… بترط حالك رط!!»
التفت صاحبنا لوجه المعزب ورفع هواجبه عالآخر… يعني ولا كلمة وصلت… قبل ما يرد المعزب عليه… دار حوار ثاني بين معلم ثاني واقف عالارض وعامل على السقالة والسقالة بدها تفلت…
«اسمع انت يا مالي ابو مزراق… خليك مترتح… اذهن تتديدم واذهن تدشر ايدك بتتكرفت… ترى اذا ارخيت بتتزقلب وبتتفنقل قدامنا. وانت يا اللي متزنقح هناك قوم قامت عليك حيط… قوم فط وشمام افزع لخويك… ول عليكوا تقول عجايز في المبكاه بس بتتراطنوا»
ضحك المعزب… ولد عالضيف… يعني التفت… ورفع حواجبه أكثر…