مدونة عبد الله كريشانبحث

عرس عند جيرانا

عبد الله حامد كريشان
رسم تعبيري لخاطرة «عرس عند جيرانا»

قال له

مالك ومال مشاكل الموظفين ومشاكل العمال وسوالفهم وهمومهم وطلباتهم… انت فاضي لهاالعالم التعبانه؟! شركاتك كبيرة ومصالحك… وعندك الاف الموظفين والعمال… وهذول ترى كل واحد عنده سبعين مشكلة وسبعين هم وسبعين طلب… اوعك تفتحلهم مجال أو تسمع منهم… اذا فتحتلهم مجال عمرك ما بتخلص… ويمكن يركبوك عالمزبوط… اسالني أنا عن هالعالم… هذول ما بنعطوا وجه… بعدين انت ليش بتسال عنهم اساسا… انت ناسي انك أكبر راس… وان بينك وبينهم الف درجة ودرجة… كل كم عامل أو كم موظف عندهم مراقب وفوق كل مراقب مراقب براقبه وعلى المراقبين في كذا مشرف والمشرفين عليهم مراقبين والمراقبين عليهم مسؤولين… وبعد هيك في رؤسا الاقسام… وكل كم قسم عليهم مدير وكل كم مدير عليهم مدير عام و… و… و… خليهم يبلشوا في بعضهم ومالك ومالهم!!! يعني بدهم يتجاوزوا كل هالدرجات ويطلعولك ويكلموك مباشرة…!!!! هزلت… شو قلة هالحيا؟!… صحيح انهم ما بستحوا… لكن الحق مش عليهم الحق على اللي وصلولك اخبارهم وصوتهم ومطالبهم… شو انت بتحسب حالك في السويد؟!… ريح راسك يا سيدي ودشرك منهم. بلا حقوق الانسان بلا بطيخ… بعدين ترى كل هالكلام اللي بقولولك عنه ان موظفينك وعمالك لازم يحبوك وتحبهم… اوعى تصدق هالحكي… هذول قصدي الموظفين والعمال تاكد انهم حاسدينك على اموالك واذا بصحلهم يمصوا دمك مش بس فلوسك ترى بمصوه وما بقصروا… ومستعدين يخلوك شحاد رسمي… بلا حب بلا خرابيط… أنا بقولك حط في اذنك هاي طين وحط في الثانية عجين وخلي حالك اهبل كأانك مش سامع ولا فاهم شي… يعني زي ما بقولوا عرس عند جيرانا… واللي مش عاجبه يضرب راسه في اقرب حيط والزعلان يا سيدي يشرب من البحر…

رد عليه قال

أنا سمعت كثير عن عيال الحرام… الحين بس شفتهم قدامي…

قراءة المنشور الأصلي على فيسبوك