مدونة عبد الله كريشانبحث

بسدك ع النقوط

عبد الله حامد كريشان
رسم تعبيري لخاطرة «بسدك ع النقوط»

ان شاء الله ابنك بكبر وبتشوفه عريس… إن شاء الله بنجاملك في عرس ابنك… عبارات بسمعها كثير من زمان… من لما انولد ابنه البكر… فترة الحليب والبامبرز، مرت على خير… صح بطلوع الروح… لكن مرت… الاولاد الحمد لله رزقتهم بتيجي معهم… كان بتمنى يحط ابنه في مدرسة خاصة يتعلم انجليزي… مدارس الحكومة ما بتعلم انجليزي… لكن مين بقدر على المدارس الخاصة؟ خلص بلاها اللغة الانجليزية اصلن بقولوا عنها لغة الكفار… رموش عيونه شابن وعيونه تقلعن لحد ما وصل ابنه للتوجيهي… مهو في كمان وراه جيش… إخوانه وخواته. الولد شاطر وهذا هو البكر وأول واحد… لازم يكمل جامعة… لكن الجامعات بتنهب نهب… آخر قطعة أرض ورثها عن ابوه باعها… وبنص القيمة… كان حاب يخليها للزمن… لكن لازم الولد يخلص جامعته… وبدو يفرح فيه… اخيرا تخرج والحمد لله… صوت زغاريت امه وصلت لوين… وأصحابه سووله حفلة من الآخر… وطخوا… بس العاب نارية… حلف بالحرام ما ناس يطخ بسلاح… مرت السنين سنة ورا سنة بعد التخرج العظيم… ما ظل نائب ولا وزير ولا لوا في الجيش ولا شيخ عشيرة… الا راحله وترجاه بلكي يشغلوا ابنه… بدون فايدة… بعضهم قال ما بقدر… وأغلبهم كذبوا عليه واعطوه مواعيد… ما انجن ولا انتحر… لانه الحمد لله مؤمن… الإيمان نعمة عظيمة… بس يا رب الصبر… صار عنده كمان اثنين لازم يدرسوا جامعة… لكن منين؟… تراجع عن كل طموحاته… حتى أولاده بطل يجيبهم سيرة الطموحات بالمره… جاره مطلع على الوضع، ساعده، ولقى شغلة لابنه الخريج اللي نسى كل ما درسه في الجامعة… لقاله شغلة في الكازية… لانه في مصلحة بين جاره وبين صاحب الكازية… الشغله هاملة ب متين دينار… يعبي بنزين للسيارات لكن ما لقى غيرها… يا ناس المتين دينار شو بدهم يسوو… عالعموم جاره مشكور ما قصر… عمل اللي عليه وطلع احسن من الجماعة اللي شبعوه كذب… الحين لازم الولد يتجوز قرب عمره على الثلاثين… بس كيف الميتين دينار بدهم يفتحوا بيت؟ حشر كل أولاده في غرفة وفضى غرفة للعرسان يتجوزوا فيها… العروس بنت حلال وافقت… وأهلها ناس محترمين قدروا الوضع… حتى المهر ظل منه شوية ما دفعوه… وكمان ظل نص حق غرفة النوم للمنجرة قال العريس بلكي بكمل المهر وبسد باقي حق غرفة النوم ع النقوط…

قراءة المنشور الأصلي على فيسبوك