مدونة عبد الله كريشانبحث

اليوم الخميس في ١٧ عريس

عبد الله حامد كريشان
رسم تعبيري لخاطرة «اليوم الخميس في ١٧ عريس»

بفرح من قلبه لأي عريس… حتى لو ما بعرفه لانه عارف قديش معاناة الشباب هالايام… اذا حبو يتزوجوا… الله يعينهم ويعين اهاليهم… اللي بقدر هالايام يتزوج بكون بطل وع قد حاله… فتح تلفونه على الالة الحاسبة… وكتب ١٧ × ٥ = ٨٥ سمط على صباحه كف رن الكف على صلعته رن… شو خمسة؟ مجنون انت؟ حد بنقط خمسة؟ عيب… الناس بتنقط عشرين… وفي ناس بنقطوا خمسين… بعدين المصاري ما ظل الها قيمة ولا ظل فيها بركة… حتى الخمسين ما بيجيبوا اشي… العشا اللي مسويه العريس مكلف آلاف مؤلفة… والله يا ناس ما في داعي للذبايح والمصاريف الزايدة ترى هي التكاليف اللي مانعة الشباب من الزواج… يعني مالها الكنافة والببسي؟ طيب الصيوان أو الصالة كمان قديش مكلفة؟… غير المهر وغير اثاث البيت وغير اجاره… منين العريس بدو يجيب كل هالمبالغ؟ مهو اغلب الشباب قاعدين بدون شغل… والحكومة شايف ما شفشي حاجة… وزي ما قالوا زمان في الامثال يا محلا العرس لولا مكاليفه… رجع مسح كل الارقام اللي كتبها على الحاسبة ورد كتب ١٧ × ١٠… يا عمي ما بدها آله حاسبة ولا شي ١٧٠ دينار… وكمان زيد عليهن ثلاث عرايس لازم ينقطهن لانهن أرحام يعني ٢٠٠… ما بعرف لويش الشباب هيك ما بتجوزوا غير بالجملة…؟ لو انه عريس أو عريسين مقدور عليهم بس ١٧ في يوم واحد وكمان في نص الشهر… وكلهم قرايب ومعارف… والله صعبة… طيب اذا بدك تطنش وما تروح كمان ما بصير وعيب… النقوط هذا واجب… مش لانه قرضه ودين بس… لانه كمان بساعد العريس اللي اكيد بكون ماكل روح الخل لحد ما قعد عاللوج… يعني واصل عالحديدة ويمكن حافر تحتها… ومتأمل ان النقوط يساعده ويسد عنه شوي… على هالحكي بكون النقوط فيه اجر وثواب ان شاء الله… بس شرط النية تكون خير… وما يتمنن على الناس ويفضح الدنيا… نقطت وسويت والحين ال ٢٠٠ دينار منين بدو يجيبهن وفي نص الشهر؟ تذكر لما زوج ابنه الكبير كيف البلد كلها حضرت والناس ما قصروا معه… قام فتح الدرج اللي بحط فيه مصروف البيت… لقى ٢٥٠ اخذ ٢٠٠ وخلا ٥٠… قال ان شاء الله ربنا ببارك للعرسان في النقوط وببارك في الخمسين وبكفونا لآخر الشهر… والف الف مبارك للشباب وربنا ييسر أمورهم ويتمم عليهم بالخير وان شاء الله زيجة الدهر… وبالرفاء والبنين…

قراءة المنشور الأصلي على فيسبوك