مدونة عبد الله كريشانبحث

يللاا ع الكروم

عبد الله حامد كريشان
رسم تعبيري لخاطرة «يللاا ع الكروم»

لا يا حجه مو بكير الساعة صارت ستة واحنا ناوين نقضي اليوم كله في الحابول… اه الحابول يعني الكرم ناس بسميه كرم وناس بسميه قصيله وناس بستان… الجو الحمد لله ممتاز وفي البساتين بكون احسن واحسن… مبارح كان دورنا في المي وسقينا الكرم كله وحتى كرم جارنا سقيناه… الله يشفيه ويقومه بالسلامه… المي متوفرة الحمد لله لكروم معان الشامية ولكروم معان الحجازية… كل جهة فيها عين مي مكفيتها وزيادة… وربنا مبارك… والناس متفقين ومقسمين المي بينهم وكل واحد بسقي في دوره… هذي الكروم تراثنا وتعب الاباء والاجداد. كانوا يعتزوا فيها حتى غناوي يغنولها واحنا لازم نعتز فيها نحافظ عليها… ما سمعتوا

(والله سفرجل في كروم معان ريان)

الزراعة مش عيب واحنا كلنا تجار وعندنا والحمد لله بساتين بنزرعها وبنستفيد منها… خيرات ونعايم الله… خصوصا هالايام التين والعنب والرمان… انتو بتعرفوا ان رمان معان ما في منه… رمان ما فيه بزر والناس بتواصفوه مواصفه من زكاته… وبيجوا من اخر الدنيا يدوروا عليه و يدوروا على نعنع معان… نعنع غير شكل… وعلى القرايص… هذا غير المشمش في وقته والتوت والسفرجل والبندورة المحمشي زي الليمون…

يلااا يا ناس لهيتونا في السواليف… النسوان بلهن بلد… انت احمل الفراش وانت التناجر والصحون وانت المنقل وعدة الشاي يلله يلله… بدنا نشب النار قبل الشمس ما تحمى الطريق بدها نص ساعة على مشية جدتكوا… وصحيح مبارح وانا بسقي الحابول سمعت صوت طلعت لقيت عيال زغار بدهم ينطوا ع كرم جارنا… ناديتهم وقطعتلهم تين وعنب وقلتهم حرام يا عمكوا تنطوا عل بساتين الناس وتخربوا… اطلبوا ما واحد بمنعكوا توكلوا… استحوا العيال على حالهم وروحوا…

شايف هذا المفتاح المعلق هذا ابو ست طقات هذا من ايام جدك الله يرحمه… يلله خذه وسبق قدامنا وافتح الكرم…

قراءة المنشور الأصلي على فيسبوك