شاي ع النار

اهل معان معروفين بحبهم للشاي… هيك معلوماتي… صح الوالد الله يرحمه كان يحب القهوة… هو مرات يغليها بنفسه من الفجر… قهوة حلوة… تركي… ويحط الدلة والفنجان على الصينية ويطلع في الحوش… في الحديقة ويولع السيكاره ويشرب قهوته… لكن أنا عمري ما حبيت القهوة… بجوز اخسر بعض الاصدقاء من هالتصريح… لكن هاي هي الحقيقة… اما الشاي… فنعمك نعمين… الشاي الشاي الشاي اوصفلك يا حبيبي الشاي… وقبل ما يبرد صب الشاي… ياااا حبيبي… هيك كنا نغني على وزن اغنية ام كلثوم…
واحنا طلاب في الاعدادي… كانت حريتنا كاملة معنا نطلع ونروح وين ما بدنا… امان وثقة وما في شي نخاف منه. واحنا ولا فخر كنا ع قد حالنا… المهم من عاداتنا في الدراسة اللي من الاخر… كنا نوخذ الكتب ونطلع نمشي برا على الخط الصحراوي… يعني مرات نبعد عن البيت كيلو ومرات نشطح ونوصل لوادي الجرذان على بعد ثماني كيلو ومرات نغامر ونوصل للطاحونة يمكن 18 كيلو… زلام مو حيالله
المهم اللي جاب السالفة تذكرت أنا كنا مخبين كذا بريق شاي في كل الاتجاهات اللي بنمشيها… واحد كان في رجم قبال الاستراحة… هذا للمسافات القريبة وواحد كان في خندق في جبل القنابل… نطلع ما نكمل صفحة في القراءة الا ويكون اجا ع بالنا ابريق شاي عالنار… نولع نار ونطلع الابريق والكاسات والسكر والشاي… وبعد ما نمخمخ على الشايات… وشاي النار للي ما جربه… غير… المهم بعد ما نشرب الشاي بتكون الشمس اغربت… بنروح… والصفحة في الكتاب ما انقلبت…
ومره… بردنا ولازم نولع نار… ما لقينا شو نولع… ولعنا .الكتاب… خاتمين العلم… الصلاه عالنبي… والحين…
بدها ابريق شاي… بس ع النار…