مدونة عبد الله كريشانبحث

فطور يوم الجمعة

عبد الله حامد كريشان
رسم تعبيري لخاطرة «فطور يوم الجمعة»

واحد صاحبي ما بدي اذكر اسمه اهله زمان ببعثوه يوم الجمعة الصبح في حدود الساعة تسعة تسعة ونص يروح يجيبلهم حمص وفول عشان الفطور… الحبيب في نص الطريق وفي الساحة اللي قدام منزل المعلمات وقدام دكان العم فالح وبيوت الشيخ عيد بن حسن الله يرحمهم الجميع… بقول في الساحة بلاقينا الحبيب بنلعب قلول بحط الصحون اللي بدو يجيب فيهن الحمص على جنب وبشارك معنا في اللعب لغاية ما يطلع العم الله يرحمه وينادي عليه في أعلى صوتة مع كم مسبه النا الجميع… ساعتها بتفرط اللعبه هو بروح يجيب الحمص واحنا كل واحد بروح على بيته يتبهدل ويفطر…

فطور الجمعة يا جماعة الخير بيظل مميز على مر الايام… يمكن بعض الأسر ما بتجتمع على سفرة واحدة الا يوم الجمعة… ومع ان الشعب الاردني كله بعاني من القولون العصبي لكن الفول والحمص والفلافل ما عنها غنى… وطبعا خبز التنور الساخن أو الطابون والبيض المقلي مع الزيتون وحلاوة الخروف مع السمن البلدي والجبنة البيضاء والزيت والزعتر واللي بحبو اللحمة والسنوبر فوق الحمص أو المقالي واللي بحبو المعلاق… كلها حاضرة على سفرة الأردنيين في فطور يوم الجمعة… يله عالفطور…

وصحتين وعافية

قراءة المنشور الأصلي على فيسبوك