يابا بلشت العطلة… بدي اشتغل

يابا كلنا عارفين انك مش مقصر… ومش مخلينا محتاجين شي… والحمد لله الخير كثير… وانا عارف كمان اني لسا في الصف السابع ومش مطلوب مني اشتغل… بس يابا الاجازة طويلة ومملة وفي كثير من أصحابي اشتغلوا وبساعدوا أهلهم… كمان يابا انتو الكبار بتقولوا ان الشغل بعلمنا نتحمل المسؤولية وبقوي شخصيتنا وبخلينا نعرف قيمة المصاري وقيمة القرش وبخلينا كمان نعرف قديش انتو الآباء بتتعبوا حتى توفرولنا اللي بدنا اياه… ومع اني بتوقع انك ما توافق خصوصا اذا عرفت اني بدي اشتغل في الأشغال العامه وفي الطرق وفي الاسفلت يعني في الزفتة… بس أنا حاب اجرب الشغل وحاب اشوف كيف حياة العمال وقديش بتعبوا وقديش بعانوا… وبتوقع كمان انك ممكن تبهدلني اذا عرفت اني بدي اشتغل بعيد عن البلد يمكن في ايل ويمكن عالخط الصحراوي… ويمكن في وادي اليتم… لكن بطمنك يابا وبقولك ان ابنك رجل وتربايتك ولا تخاف عليه… .
… والله أنا شايفك بتبتسم وشايف عيونك يابا بقولوا انك موافق… الحمد لله… الله يطول في عمرك يابا… يله خليني اروح احضر اغراضي… ادعيلي يابا… هات يابا ايدك ابوسها…