مدونة عبد الله كريشانبحث

شو اسم أمك؟

عبد الله حامد كريشان
رسم تعبيري لخاطرة «شو اسم أمك؟»

تسعين بالمية من هوشاتنا واحنا طلاب في المدرسة كانت بسبب اسم الام… كان عيب عندنا واحد يعرف اسم امك أو يقول اسم امك أو يناديك باسمها… الام والأخت والزوجة والبنت وكل أنثى اشي مقدس وخط مش بس احمر خط نار… ارتفاع سور البيت خمس أمتار… مضافة الزلام معزوله هناك في طرف البيت بعيدة عن المحارم… لو تدخل بيت صاحبك الف مرة ما بتشوف خيال أنثى. السوق والشوارع للزلام بس والحريم في البيوت المستورة… حتى الزبال كان يدق عالباب ويبعد عشرين متر هناك لبين ما الحرمة ومن ورا الباب تطلع الزباله أجلكم الله… الاولاد الزغار كان من مهماتهم يكنسوا باب الشارع حتى ما تطلع الحرمه… لما النسوان يطلعوا زياراتهم للجارات أو للواجبات… عليم الله لو تلاقيك امك في الشارع ما بتعرفها… اسود في اسود من الراس للرجلين… الحمد لله… السترة نعمة مطلوبة ربنا يستر عالجميع

الاستاذ محمد خليل خطاب ابو خطاب عليه رحمة الله أحد رجالات معان استاذنا واستاذ اجيال قبلنا كان من اكبر الحفاظ والنسابة على مستوى الأردن يحفظ اسماء كل الرجال والنساء الصغار والكبار… كان من قبيل المداعبة والمزح اذا لقى احد طلابه قال والسيجارة لا تغادر فمه كيفك يا ابن فلانه ليري ردة فعله… كنت وأخي احمد ماشين باتجاه بيارة بلح لما شافنا الله يرحمه قام يصفق ويغني على الطريقة المعانية

وعيالكي لا يا (فلانه…) لا عديمتهم

جر المناسف وراسك طايلن فيهم

وذكر اسم الوالدة…

قراءة المنشور الأصلي على فيسبوك