مدونة عبد الله كريشانبحث

الفطور جاهز

عبد الله حامد كريشان
رسم تعبيري لخاطرة «الفطور جاهز»

مع مناجاة المستغفرين في السحر ومع التسابيح… ومع صوت المؤذن… الصلاة خير من النوم… ببدا يومهم… بعد الصلاة تمتمت يا صباح يا فتاح يا رزاق يا عليم… يا رب وفقنا وارزقنا وباركلنا واعطينا القوة والمروة…

زبلت الطابون وولعت الجلة، من مبارح طحنت على الرحى كيس قمح كامل عبته من الكوارة وعبت كيس طحين زغير ع قد العجنة وربطته ورفعته فوق ع الروزنة… تناولت الكيس وتربعت وبسم الله سمت… وقعدت تعجن… غطت العجنة… وراحت للبير ومن الدلو عبت سطلها بدها ترش تراب أرضية البيت قبل ما تكنس… مكنسة القيصوم مش بس بتكنس… بتعطر كمان… غسلت اديها… راحت للزريبة لقت الحج مفطر الغنمات… هي من مبارح ربطت الجديان حتى يظل حليب للاولاد… حلبت المعزه الشامية… تبارك الله… القيشنية تعبت لاخرها… دخلتها وغطتها وحطتها جنب البابور… الطابون جاهز والعجنة جاهزة… قرصت أقراص الخبز… فتحت غطى الطابون… حركت الرضاف وحطت خبزاتها… الله على ريحة خبز الطابون… الحمد لله… السنة سنة خير… الزيت… السمن… الجبة… اللبن… ونعايم الله كلها موجودة… حطت الرغفه على الطبلية… وجاب الولد خمس بيضات من خم الجاج… ولعت البابور… غلت ابريق الشاي الأزرق الكبير… وغلت الحليبات كمان… قلت القلاية وقلت كمان البيضات في السمنة البلدية… ريحة الفطور بتفتح النفس… قالت يلله يا بنات حطن الصحون ولا تنسن الزبدة والحلاوة… وانت يا بنيي روح نادي ابوك واخوانك الفطور جاهز

قراءة المنشور الأصلي على فيسبوك