خذها معلمه وحط راتبك ع راتبها

المفروض ان الناس آخر الشهر لما تستلم الراتب بتفرح وبتنبسط، لا يا اخوان… بالمره مو مزبوط هالكلام… اللي بصير هو العكس، أنكد يوم في الشهر هو يوم استلام الراتب، وأغلب الايام بتصير مشكلة وبطلع صوتنا… أمي الله يطول عمرها لما عينوني استاذ بثلاثميت نيره بعد الجامعه وبعد طلوع الروح ورموني في آخر ما عمر الله قال لاني تعينت جديد ولازم أخدم وأدرس في القرية كم سنة… المهم بعد (حراث) خمس سنين وبعد ماصار معي خمسميت نيره قالت أمي يمه خذها معلمه المعلمات كويسات وبتحط راتبك ع راتبها… تعالي يمه الحين وبعد هالعشر سنين وشوفي شو صار فينا… بتتذكري يمه بعد ما تجوزت بشهرين لما كنت كل يوم تسأليني شو مالك؟ ما في شي جاي عالطريق؟ شد حيلك يمه بدي افرح في عيالك… وخلفنا بعد هيك خمسة، الحمد لله يمه العيال نعمه… بس بتتذكري كمان كيف كنا نخلف ونرمي عليك لحد ما نرجع من المدارس، منين يمه نجيب للحضانات وللروضات… المهم انت ما قصرتي… صح جننوكي وعيفوك عمرك بس يله انت جدتهم…
بتعرفي يمه شو صار فينا الحين؟ والله يمه سمعت الشيخ المفتي بقول اللي راتبه ما بكفيه بتجوز عليه الزكاه… شفت لوين وصلنا؟!!!
يمه احنا راتبنا ما بكفينا… يعني بتجوز علينا الزكاه!!! شفتي يمه… أنا ومرتي المعلمة اللي قد الدنيا راتبنا يمه الاثنين مع بعض سبعميه وخمسين، احلفلكي انه ما بكفينا خمس أيام… تعالي احسبك اياها يمه… اسمعي… أنا علي قرض بخصموا من راتبي ميت نيره وهي عليها قرض بخصموا كمان من راتبها… وبدنا اجار بيت ميتين وبدنا لفواتير المي والكهربا وبدنا للغاز ولمصروف المدارس والمواصلات و… و… بخلص راتبي وراتبها واحنا يمه ما أكلنا ولا شربنا…
قالت أمي بعد ما حطت اديها ع راسها وسكرت اذانها
خلص يمه بكفي وجعت قلبي من جوا