العيلة

كبرت العيلة وامتدت، الاولاد والبنات تزوجوا، الاحفاد كمان تزوجوا، الكل عايشين في بيت العيلة… النسايب كمان موجودين، وحتى أصحاب العيلة وضيوفها. النسايب والاصحاب والضيوف… مثل الاولاد،… الكل في نفس البيت، البيت الضيق بوسع الف محب، قالتلهم الجدة كلكوا في محبة الله واحد، لكن بعض الاولاد صاروا يشوفوا الحياة صعبة، وبعضهم بقول الأمور ليش هيك تعقدت،، كلامهم صحيح، طلبات الحياة كثيرة والاحتياجات ما بتخلص، اغلب الرغبات ما بتتحقق، بعض الاولاد مقتنع وراضي باللي قسمه ربنا ومبسوط، ما بفكر كثير، والبعض لا… بقول ناقصنا الف شغلة وشغلة، الحياة تطورت واحنا الشباب لازم نكون طموحين… الاحفاد اغلبهم جامعيين وبتكلموا كثير عن حقوقهم، جدهم بحكمة الكبار قال يا شباب طولوا بالكوا… احنا والحمد لله بخير وربنا مباركلنا لاننا عايشين مع بعض، ولأن قلوبنا على بعض، بنوكل من سدر واحد، وبنام تحت سقف واحد، ترى يا اولاد المصاري مش كل شي في هالحياة، السعادة مش في كثرة القروش، السعادة الحقيقية في القناعة والرضى وفي راحة البال، استعيذوا من الشيطان خليكوا ايد وحدة،، خليكوا متماسكين ومتحابين، ربنا بفتحلكوا كل أبواب الرزق الحلال وكل أبواب الخير وبباركلكوا… يا اولاد بس بالقلوب الصافية وبالنوايا الطيبة بنصلح الحال وبرتاح البال…