يا زلمي خاف الله

— الو
— خير شو بدكي ع هالصبح؟
— يا زلمي استنى بس خليني اسلم عليك
— بلا تسلمي بلا بطيخ… قولي وخلصيني مش فاضيلك
— يعني لمتى بدك تظل هيك مهملنا ومنت حاس فينا؟
— شو بتخبصي يا مره شو مهملكوا وحاس ومش حاس… صايره تتكلمي بالاحساس… هيكوا عايشين… شو اسويلكوا…
— هو هاي عيشة اللي احنا عايشينها؟ انت تاركنا وعايش لمرتك ست الحسن والجمال… واحنا ولا احنا على بالك… وحال البين حالنا…
— اسمعي لا تكثري الكلام أنا ببعثلكوا حق الخبز وجايبلكوا سكر ورز ومعلبات… خلص شو بدكوا؟
— يا زلمي خاف الله هو خبزاتك والمعلبات هاي هي بس حاجتنا؟!!… أولادك… بتتذكرهم اولادك ولا ناسيهم كمان… أنا بقول شكلك ناسي حتى قديش عددهم… وناسي اصلا ان عندك اولاد وبنات… أولادك تدمروا… ضاعوا…… واحد مريض بدو يموت مش عارفين نعالجه… والثاني قرب ينجن مو ملاقي شغل، والثالث داير بالشوارع بدو يهمل… والبنات عنسن ما حد راضي يخطبهن من حالة البين اللي احنا فيها… وازيدك من الشعر بيت… يمكن تتحرك مشاعرك… البيت كل شي فيه خربان… كله خرب… حتى سقف البيت بدو يوقع ع روسنا… الحقنا يا زلمه حرام عليك…
الو… الو… ليش ما بترد؟ الو… سكرت الخط… منك لله…