له له يا عمك

ابوك وامك الله يجزيهم الخير ما قصروا ربوا وتعبوا وان شاء الله كله في ميزان حسناتهم، لكن زمان مش بس ابوك وأمك والمدرسة هم اللي بربوك وبمونوا عليك وبوجهوك وبنصحوك وبعلموك، لا، في معهم ناس كثير بساعدهم وبساهم في تربيتك وتوجيهك بقصد وبدون قصد… عمك بمون عليك… وخالك طبعا وجدودك وكل قرايبك، اقولك، حتى قدام ابوك اذا عمك شاف منك تصرف غلط ممكن يسلخك خماسي مرتب وترى عادي وزي العسل ع قلب ابوك لانه عارف هالكف لمصلحتك، ما في لا حساسيات زايده ولا أنا ما بحب ناس يتدخل في أولادي ولا ليش ما يروحوا يربوا أولادهم قبل ما يربوا أولادنا، كل هالحكي ما في منه بالمره .
في الشارع لما كنا نلعب اذا مر أي زلمه كبير حتى لو ما بنعرفه كنا نحترم حالنا وننتبه لتصرفاتنا، يعني ننتبه ما تطلع منا كلمة عيب أو تصرف مش مزبوط، لأن هذا اللي مار في الشارع ممكن يناديك ويسألك انت ابن منو؟ ويعطيك كلمتين في جنابك من الاخر، واخر شي يقولك ترى إذا بشوفك بتعيدها مرة ثانية بقول لابوك بخليه يعلقك… لما تروح تشتري من الدكان لازم تنتبه لتصرفاتك حتى ما تتبهدل لان راعي الدكان كمان عنده صلاحيات، أما الحلاق فكل ما تروح تحلق شعرك بدك تستعد تسمع محاضرة في التربية والأخلاق والسلوك الحسن الحلاق كمان بخاف عليك وبده تكون أحسن الناس محترم وكويس وتبيض وجه أبوك وعيلتك وعشيرتك وما تجيبهم الكلام…
من أقسي البهادل والعقوبات النفسية لما تكون مسوي اشي غلط قدام الناس ويناديك واحد من كبار وشيوخ الحارة اللي بعرفوك وبعرفوا ابوك وعيلتك ويقولك وانت مدنقس راسك في الأرض من الخجل وقدام هيبته وعبايته اللي بترفرف ويقولك بس هالكلمتين:
له له يا عمك…
انت بتذوب في هدومك ذوب بتقول لو ضربني أهون…