سبع نجوم

حامل الملف، الملف بده ينسطح من كثر الاوراق، أكبر ملف لقاه في المكتبة جابه، شغلته معقده، صارله اسبوع بجمع في الأوراق والصور وحطهم كلهم في الملف حتى ما ينسى اشي ويرجعوه، ان شاء الله ما يرجعوه، مقروص هو من الحكومة ومن مؤسساتها، معاملة ابسط من هيك بكثير قعدت معه شهرين وما خلا لا واسطة ولا معرفه وما دخله في المعاملة، بعدين بصراحة بعض الموظفين كمان طلبوا منه مصاري رشوه، وكمان سوى كم هوشة وما خلصت معاملته، الله يستر هذي المره قديش تقعد وايش يصير معه…، لكن يا جماعة شو الدعوة؟ في اشي غريب اليوم، اول مرة بشوف مؤسسة حكومية مثل هيك!! مواقف سيارات متوفرة، وشباب لابسين زي موحد كأنهم مضيفين طيارات بوخذوا مفاتيح السيارات من المراجعين وبصفوها وابصر شو بقدمو للناس هدايا، حتى شوفير التكسي اللي هو راكب فيها مستغرب مثله واحد من الشباب هذول المضيفين اجا مبتسم وسلم عليهم وأعطاهم كل واحد علبة عصير باردة وورده حمرا قال هاي ضيافه من المؤسسة، الباركنج زي الفل، وعلى الجناب قواوير ورد اول مره بشوف مثلها كانك في فيلا في عبدون أو في دابوق… ايه؟! شو القصة؟! البناية من بره بتلمع لمع، وعند المدخل لوحات ترحيب بالمراجعين و على الجوانب طربيزات عليها كاسات مي باردة مغبشة من البرودة وباكيتات محارم، حتى الارض نفسك تقعد عليها من نظافتها، دخل، عند الاستقبال قاعدات بنات مرتبات سبحان الخالق، اهلا اهلا يا استاز تفضل كيف بدنا نخدمك، الزلمه طار ضبان عقله، وحده صبتله فنجان قهوة، والثانية قدمتله ملبس فاخر، قال لااااا هيك كثير؟! شو اللي صاير؟! المؤسسة من جوا بتفتح النفس، ولا مراجع قاعد بستنى، ولا طوابير، ولا دخان، ولا زبايل ولا صوت فغير وهوش، ولا كشرة ولا مسبات، حتى الموظفين ورا مكاتبهم كلهم مبتسمين، وريحة المؤسسة كأنك في أفخر محلات عطور، الزلمه فتح ثمه عالاخر، قرب ينهبل، قالت يا استاز شو مالك شكلك من زمان ما راجعتنا، بئول كيف ممكن نخدم حضرتك؟ بعدين انت ليش يا استاز مغلب حالك وجاي لعنا كان رنيت علينا أو بعتت بس مسج نحنا بنيجي لعندك ولو؟! احنا الخدمة عندنا سبع نجوم…، انسطل الزلمه قرب يوقع على وجهه…
يا أخ يا أخ… حس زي حديده غزته في جنبه، اصحى يا أخ الله يخليك اوراقك وقعوا على الارض على القهوة، شايف الارض كيف شكلها لحق أوراقك قبل ما يغرقوا، شو جاي تنام هون؟! ها؟! شكلي غفيت، ايش غفيت!! صارلك تقريبا ساعة بتشخر، أنا مستغرب كيف عارف تنام في هالدوشة والهوش قبل شوي كانوا بدهم يذبحوا بعض وصلت سحب مواس وانت نايم، وبالله عليك كيف اجاك نفس تنام في هالعفن والدخان والريحة، طيب انت كم رقم دورك؟ رقمي ٢١٦ ليش كم وصل الدور؟ الدور وصل ١٨٠ ارجع نام احسنلك، بعدين استنى شكلك كنت بتحلم كنت اشوفك بتتبسم وانت نايم، احكيلي شو حلمت؟ اكيد حلم غرامي… يا خطير انت… ههه… آه مزبوط أنا خطير كنت بحلم حلم غرامي كثير…، ترى يا صاحبي حلم الجاجة قمحة…