خبز وشاي

البيت طين، بس الحبايب كلهم ملتمين، لا هم دنيا ولا عذاب آخره، الاولاد في الخرابة، البنات بلعبن شبرا قمرا شمس نجوم أو حجلة، وكل ما بتعبن بقعدن حول بعض بلعبن حاريدا باريدا… الاولاد مع اولاد الحارة بلعبوا شوي كرة قدم أو مزقر وشوي سبع حجار أو طمية وكمستير وشوي حاب أو سيارات سلاك أو قلول أودحلة… العاب كثير كلها بحبوها وبنسوا حالهم فيها حتى الاكل والشرب مع اللعب بنسوه وما بسألوا عنه .
الحجة بتغزل على ايدها خدرة بساط قربت تخلصها، بدها اياها نقوط لابنها العريس، البنات وحده بتجلي ووحده بتشطف ووحدة بترتب مقسمات الشغل بينهن… الحج يا اما في الجامع يا اما قاعد مع الجماعة عالمصطبى بشربوا شاي وبستنوا الاذان…
المعزه خلفت جابت جدي وسخله والجارة كانت موصيه على أول حلبه لما تخلف المعزه بدها الجرجب دوا، الجاجة وراها بيجي عشر صيصان بس بدك تقعد وتتفرج عليهن واحلى من هالمنظر منظر البيضات في الخم وتكون انت اللي لقيت البيضات، اذا كانوا كثار بجوز يطلعلك بيضة الك انت تشتري فيها، بطلعلك من الدكان بالبيضة حبة بسكوت ماري وخمس حبات راحه معطرة ويمكن حبة ويفر وبتعبي جيبتك قضامه مالحة.
السهرة في الصيف تحت المعرش، قطوف العنب مكيسات كل قطف في كيس يمكن مشان العصافير ما ينقرن العنب أو يمكن عن العين، الله اعلم، ويمكن عنا احنا، زير المي ميته مثل البوز ملفوف بخيشة وطالع من الخيشة قمحات وشعيرات واحد من العيال زارعها… أغلب ايام الصيف بكون فوق الزير سدر فيه بطيخة من بطيخ جنين مشقحة سيور حمرا حمرا من شكلها بتحسها زي العسل، وإذا انك جيعان كثير بتوكل معها جبنة بيضا… الراديو مفتوح عالاخر… سلوى بتلعلع بين الدوالي والكرم العالي، سميرة توفيق بالله تصبوا هالقهوة، عبده موسى مع الربابة يا مرحبا ويا هلا منين الركب من وين… وبين الساعة أربعة وخمسة أم كلثوم انت عمري…
أقولك، كل اللي في البيت ما معهم ع بعضهم خمس دنانير لكن الحمد لله الكل مبسوط وبنكت وبضحك وما في مشكلة حتى لو الأكل اليوم بس خبز وشاي.