ششبرك… و ذكريات

الكل محبوس في بيته… والحجر عام… والزهق طام… وأخبار كورونا بتجيك من كل حدب وصوب، اشي من الفيس واشي واتس واشي من التلفزيون… يعني اكيد في قلق والكل تقريبا مكتئب… عشان هيك أنا طلبت من الداخلية يعني من أم العيال الله يحفظها ويطول عمرها… طلبت منها ششبرك… اكلتنا الشعبية العزيزة، واذا أصدقائي من مصر ومن تونس ومن باقي الدول الشقيقة ما بعرفوها من فضلهم يشوفوا الصور أو يرجعوا للجوجل
المهم أنا طلبت الششبرك لعدة اسباب ولعدة نوايا… اول شي حتى نساء البيت كبار وزغار يتسلوا… ثاني شي أنا بصراحة بحب ريحة حشوة الششبرك اللحمة المفرومة وهي بتتحمر مع البصل… وبحب ريحة الششبرك المقلي… ثالث شي لانها اكلة شعبية تراثية وأنا ما بدي هالأكلة تنقرض لا سمح الله حتى اللي بظل فينا عايش بعد الكورونا يوصلها للاجيال القادمة وما ينحرموا منها…
المهم صديقي اذا نفذتها في بيتك وما افلحت ريحة حشوة الششبرك معك وما ريحت اعصابك واذا منظر حبات الششبرك وهي مصفوفة على السدر ما ادخلت السعادة على قلبك وظليت حاس بالكئابة فما عليك الا انك تسوي مثلي… طلع البوم صورك الحلوة واختار صور الذكريات السعيدة وركز فيها وحاول تعيشها مزبوط لغاية ما يجيك الخبر السار وتسمعهم بقولوا يلااا تفضل الششبرك جاهز…