خبيزة… عكوب… كهموم…

مين ما بحب الربيع ورحلات الربيع وطلعات الربيع…؟! لكن بنحب الأردن أكثر وبنخاف على بعض أكثر… عشان هيك ملتزمين وقاعدين في البيت وراضين، وانتو كمان التزموا وخليكوا في البيت، وما في مانع نطلع مع بعض رحلة من خلال الفيس والكلمات، نتذكر فيها بعض الرحلات. خصوصا رحلات جمع الاعشاب في الربيع. كل منطقة في الأردن بتختلف أعشابها عن المنطقة الثانية، أعشاب الجنوب غير أعشاب الوسط والشمال والعكس صحيح، خبراء الاعشاب بعددوا مئات الاسماء من الأعشاب في الأردن، أنا بصراحة مش خبير في الأعشاب لكن بتذكر بعضها كنا نلقطها من سهول معان واحنا زغار، بعضها كنا نوكله على طول مثل الكهموم يمكن اسمه حميض في غير منطقة كمان كنا نوكل الشحوم والقعفير وفي أعشاب كنا نلقطها ونوخذها للبيت دوا مثل الشيح والقيصوم والبعيثران والجعدة، كنا نطلع في مثل هالايام في الاجازات ويكون معنا كبار من الاهل يعرفونا شكل العشبة المطلوبة، ويعرفونا بالعشبة السامة حتى ننتبه.
رحلات جمع الاعشاب رحلات ممتعة لا تنسى، كنا نطلع مشي على الأقدام من الصبح ونرجع المغرب، نسوي شاي على النار ونفطر ونتغدا في البر، كنا نمشي على رجلينا عدة كيلومترات بدون ما نحس أو نتعب…
في الأردن بشكل عام في اعشاب لا تعد ولا تحصى، خبيزة، عكوب، علت هندبا، بابونج… كمان في رشاد وزعتر وفرفحينا وحندقوق وجرجير وغيرها كثير… ومنظر الأعشاب المنتشرة في سهول وسفوح الأردن وجباله بين ورود الاقحوان والسوسنة السوداء وزهرة البابونج المنتشرة في كل مكان، منظر بوخذ العقل، بتشوف قدامك لوحات رائعة ومناظر خلابة بتشرح الصدر وبترد الروح…
ربيع الأردن ساحر وجميل… وكل ربيع ساحر وجميل… ما عدا… الربيع العربي… وربيع كورونا… الله لا يعيدهم…