مدونة عبد الله كريشانبحث

الله… ما أحلى هالريحة!!

عبد الله حامد كريشان
رسم تعبيري لخاطرة «الله… ما أحلى هالريحة!!»

ما بدي اتكلم لا عن سافاج ولا عن فهرنهايت ولا عن كرتير ولا عن أي عطر فرنسي… مع اني بحب كل ما ذكر… لكن بدي اتكلم عن روايح زمان روايح عشقناها وبعدها معششة في الوجدان…

ريحة خبز الطابون لما تفتح غطا الطابون ويكون الخبز قمح ومقحمش، ريحة سنابل القمح لما تحرقها في ارضها وانت في رحلة مع الشباب بتسوو فريكة، ريحةحطب النار وأمك بتخبز على الصاج، ريحة الطبايخ في الحارة وانت مروح عالبيت في رمضان قبل أذان المغرب بشوي، ريحة الششبرك وصواني الكفتة وانت طايح من الجوع، وريحة المجللة في رحلات البر، وريحة قلاية البندورة واللحمة وريحة الكبسة اللي بسووها سواقين الشاحنات على جنب الطريق، ريحة القطايف بتنخبز قدام الدكان في الشارع… ريحة الحوش في الصيف مشطوف وانت مكوع تحت الياسمينة والفل مفحفح وقدامك كاسة شاي بنعنع مع الابريق الازرق، ريحة طابون الجيران الفجر لما حجتهم تولع الجلة، ريحة القهوه وهي بتتحمس على النار وسط قعدة الشيوخ، ريحة دكاكين زمان وكوكتيل روايحها الزعتر والهيل والبهارات مع الصابون النابلسي مع الأعشاب مع ريحة القضامه الفيصلية والملبس والتوفي وبيض الحمام، ريحة البخور وعود الند في صندوق جدتك لما تنزله من فوق الخزانة وتفتحه بتدور على شغلة، ريحة حوش التراب في بيت الطين لما ينرش بالمي ويتكنس بمكنسة قيصوم، ريحة دخان اللف اللي كان يجي من الشام ويلفوه الشياب في ورق اوتومان وهم قاعدين العصر على المصطبة، ريحة التايد في الملابس المغسولة اول ما تلبسها… ريحة صابونات اللوكس المعطر بين الهدوم في خزانة الحجة، ريحة المواليد وانت بتأذن في اذانهم وريحة احفادك لما تبوسهم وانت بتلعبهم بعد الحمام، ريحة القهوة والكعك صبحية العيد، ريحة الحجاج لما يرجعوا من مكة…

واحلى شي لما تشم ريحة حبايبك…

قراءة المنشور الأصلي على فيسبوك