مدونة عبد الله كريشانبحث

صحون رايحة وصحون جاية

عبد الله حامد كريشان
رسم تعبيري لخاطرة «صحون رايحة وصحون جاية»

الفضيلة يا جدك عادة من عاداتنا زمان في شهر رمضان، في يوم الفضيلة بتزود طبختك وبتكثرها حتى توزع منها على الجيران وعلى القرايب وعلى المساكين. أكلات الفضيلة في معان مثلا كثيرة.، منها الششبرك والكبيبات وفي ناس بطبخوا للفضيلة ملفوف اومحشي وغيره… هذي العادة الطيبة مش بس في معان، لا، موجودة في كل مكان لكن اسمها غير، في ناس مثلا بسميها مساكبة يعني الناس تسكب لبعض من طبخاتهم… الفضيلة والمساكبة… من العادات الطيبة، عادات بتدل على الخير وعلى النفوس الطيبة وبتدل على الكرم وعلى محبة الناس لبعضهم وعلى تواصلهم وكيف انهم بتفقدوا بعضهم وبتفقدوا مساكينهم… اذا بتوقف في الحارة قبل الفطور بنص ساعة بتشوف المنظر الجميل… صحون رايحة وصحون جاية مع الاولاد وبتشم وانت صايم روايح الطبخات الزاكية روايح بتشهي… لكن يا جدك لا تفكر ان الخير والكرم بس موجود في ايامنا… لا… بالعكس… الخير موجود فيكم كمان أنا بسمع هالايام عن موائد الرحمن… وعن السبيل… وهذي كلها عادات كرم وخير وتراحم وكلها عادات طيبة.

الخير يا جدك موجود في كل زمان ومكان…

ورمضان كريم…

قراءة المنشور الأصلي على فيسبوك