يمه… كل عام وانت بخير

يمه كل عام وانت بخير.
وانت بخير يابني يا حبيبي بس شو المناسبة؟
اليوم يمه عيد المرأة هو كان مبارح بس أنا نسيت اباركلك. والعالم كله بحتفل بالمرأة. .
يا بني يا حبيبي أنا بعرف انه ما في عيد غير عيد الله اللي فرضه الدين… والعالم يا بنيي اللي بده يحتفل بالمرأة زي ما بتقول يا ريته يكون صادق… ويرحمها بس… ويكفيها من شره…
ليش يمه بتحكي هيك؟ هي التلفزيونات بتتكلم عن المرأة كلام ممتاز والناس كلهم بكتبوا على التلفونات… عالواتس… وعالفيس عن المرأة وبباركولها وبحطولها صور ورد وفيديوهات أغاني… وقلوب حب…
ااااه… ممتاز ما قصروا… مشكورين با وليدي… يا وليدي شو بفيد الكلام والصور وقلوب الحب… تلفت حواليك وشوف احوال النسوان… المرأة ع قولتك… شوف زوجتك… شوف بناتك الموظفات… شوف خواتك… شوف جيرانك… جيبلي بس وحدة منهم متهنية زي الناس… الشغلة مش كلام وصور واغاني… احنا يا بنيي يا حبيبي كنا صح نتعب ونحرث ونهلك في الشغل… كل شغلنا بايدنا… ما في اجهزة ولا رفاهية مثل اليوم… لكن كنا معززات مكرمات في بيوتنا… الرجال بشتغلوا برا والنسوان بتشتغل في البيوت… ما حد بتحكم فيها ومش شايلة غير هم بيتها… المرأة اليوم مرمطوها وحملوها فوق طاقتها وفتحولها كل ابواب الشر… روح شوف المحاكم وبلاويها… وشوف هناك احوال المرأة مزبوط… وبقولوا عيد المرأة… أي عيد؟!!
شوف المرأة العاملة قديش بتعاني… وقديش بتتعذب… عشان تشتغل وتجيب فلوس تساعد زوجها ويقدروا يعيشوا.ولو عيش الكفاف… طول النهار في الشغل برا البيت والاطفال مرميين بالحضانات، ولازم ترجع اخر النهار تنظف بيتها وتطبخ اكلها وتدرس اطفالها وتشوف امورهم. وامورها وامور زوجها… و… و……
ااااخ يا بنيي… يا ريت تقول للعالم اللي عمل بالمرأة هالعمايل ليش ما بستحي على حاله ويخجل لما يقول يوم المرأة وعيد المرأة؟!؟!؟!