جدتي بدي أسألك

جدتي بدي أسألك وما أسألك عن ذنوبك… شو الأشياء اللي كانت في بيتك زمان وما فيش منها الحين؟
ايييييه يا جدتك!!… كثيييير…
مغزلي، ثوبي الهرمزي، مكواة الفحم، طاسة الرعبة، السفرطاس، الفنار، اللوكس، مكنسة القيصوم، غليوني، نمليتي، بيرو الهدوم، تخت النحاس، صندوق عرسي، بارودة جدك الالماني، وشبريته، قدور النحاس… ويش أعددلك يا وليدي لما أعدد… بيتنا زمان كان طين، واسع وكبير، بارد في الصيف ودافي في الشتا، وما في منه الحين، كل اللي كان في بيتنا زمان الحين ما ظل منه شي، كل شي يا جدتك تغير، حتى الناس اللي كانوا زمان ما ظل منهم ولا مثلهم، بيتنا كان فيه حوش مكشوف للسما وللشمس ووسط الحوش كان في احواض زريعة ومعرشات دوالي، نقعد فيه العصر، كان فيه ياسمين بفحفح وشجر مثمر، وعلى داير الحوش كان في تنك وقواوير ورد أشكال وألوان بتفتح النفس، ما كان عندنا كهربا ولا مراوح ولا ثلاجات ولا مكيفات ولا تلفزيونات، لكن كنا مبسوطين وما شاء الله علينا، في النملية بنحط لوازم المطبخ، والضو فنار أو نمره أربعة، بعد العشا الكل بنام والكل بصحى قبل طلوع الشمس… بنسمع الاخبار في الراديو، بابور الكاز بدل فرن الغاز، ومنقل الفحم بدفينا في كانون… في الصيف بنشرب من الزير، وخبزنا في الطابون أو عالصاج، في خرابة البيت بنربي جاج بياض وأرانب وفي الزريبة غنماتنا منها حليبنا وجبنتنا وزبدتنا واذا دهمنا ضيف بنذبحله منها… اااخ يا وليدي فتحت علي جروحي، شوقتني لجدك الله يرحمه، وشوقتني لقعدات اعمامك وعماتك وللمّات، شوقتني لريحة خبز الطابون ولريحة مقشة القيصوم… شوقتني لصوت ديك الفجر وللاذان، وشوقتني لحارتنا ولكل الجيران