جوز مباريم

الدنيا بعدها بخير يا جدتك… والناس لبعض… خذ هذول… جوز مباريم من جدك الله يرحمه جابلي اياهن رضاوة… مباريم صب ثقال من تبعات زمان مو مثل مباريم اليوم، فراطة… مرة جدك زعلني الله يسامحه ويغفرله… وحتى يرضيني جابلي جوز المباريم هذول من عند ابو سارة، هيك كانوا الزلام اللي بزعل مرته يجيبلها يا مبرومه يا ثنتين… جدك الله يرحمه كان عصبي بس نفسه طيبة وكريم… يله خذ وروح اعطيهن لوزير الصحة… فاهم… لوزير الصحة… بايده خليه يبيعهن ويشتروا في حقهن دوا للمرضى… الله يعينهم… ويعين هالدوله كيف بدهم يلحقوا على المستشفيات والمرضى وعلى الناس… اكل ودوا ومصاريف…
يا جدتك لازم الناس تفزع لبعضها خصوصا وقت الضيق… ما في مره من جيلي غير باعت ذهبها لجوزها أو لعيالها أو لاهلها لما يحتاجوا… ولا كيف؟ هو الذهب لويش… للزنقات…
بعدين يا جدتك الحكومة ما بصير تتحمل كل هالبلاوي لحالها… منين يجيبوا؟ لازم الناس تتحرك… تتحرك يعني تتبرع مش تتحرك تطلع من بيوتها… لا… لازم كل اللي مالهم شغل برا يقعدوا في بيوتهم ويسمعوا الكلام بس يتبرعوا ويساعدوا الدولة… وينهم اصحاب الاموال؟! اللي طول عمرهم بجمعوا وبحوشوا… ما شبعوا بعدهم؟
وانت كمان يا جدتك لا تطلع رن عالوزير… ولا اقولك رن على الدفاع المدني بلاش الوزير والله شفته مبارح في التلفزيون مو قادر يوقف ولا قادر يتكلم من التعب الله يعينه ويعين كل الوزرا والله ما قصروا كلهم ويعين الملك والجيش والامن والاطبا والدفاع المدني ويعين كل الحكومة ويعين كل الشعب
وربنا يسلم الجميع