مدونة عبد الله كريشانبحث

عونه

عبد الله حامد كريشان
رسم تعبيري لخاطرة «عونه»

محمد… علي… ابراهيم… يله… يله عيالي بسرعة الحقوني ع العمرة… لازم نبلش قبل ما تطلع الشمس… الصبة بدها فزعة وبدها عونه، اذا حمت علينا الشمس واحنا بنصب بنشف الاسمنت وبتشقق وبخرب، الجيران والحارة كلهم عارفين إنا اليوم بدنا نصب السقف، أنا كمان بلغت بعض الشباب… يله عيالي انت تعال معي وانتو روحوا جيبوا كل الاغراض اللي اتفقنا عليها والحقونا عالورشة… باذن الله قبل اذان الظهر بنكون خلصنا كل شي وقعدنا للغدا… شايف يا بنيي كيف الدنيا والحمد لله بعدها بخير وكيف الناس لبعضها… بس كان نفسي بدل تنكة الحلاوة اللي جبناها، اذبحلهم ذبيحة واغدي الشباب مناسف… والله بستاهلوا… لكن شو نسوي قصرت المصاري، البنا بوخذ كل القروش… وانا عارف ومطمن ان جماعتنا بعذرونا ومقدرين الوضع… البنا يا بنيي ربنا بيسره… مثل الزواج ومثل الحج ومثل الدراسة… واحنا الحمد لله كل الامور تيسرت معنا، ما كان معنا نبني لو مطبخ… وهاظا احنا كملنا البيت…

اوووه…!! شايف ربعنا وصلوا قبلنا…

السلام عليكم والله يصبحكوا بالخير والنور والسرور… ما شاء الله سبقتونا وصرتوا واصلين وصرتوا كمان محضرين الجبلة!!! الله يجزيكوا كل خير وربنا يقويكوا يالنشامى… فعلا انتو عونه

الحين أنا متأكد ان الحاره كمان شوي كلها بتسمع الصوت العالي مع الهمة:

ولع الباطون ولع

اشتغل ولا اتقلع

…

أربعة شالوا الجمل

والجمل ما شالهم

اربعة شالوا الجمل

والجمل ما شالهم

قراءة المنشور الأصلي على فيسبوك