دعك… بفتح الدال وكسر العين

يلاا اصحوا الساعة صارت ثمانية… يلااا… أنا صاحية من الستة… بكفي نوم… صارلي ساعة بصحيكوا… يلااا اليوم الجمعة مشان تفطروا وتتحمموا وتروحوا للصلاة… انت خذ الصحون وروح جيب حمص وفول وخبز… لا تخليه يحط عليه زيت زيتهم محنحن… ومش تقعد في الطريق تلعب مع العيال قلول… وتخلينا نستنى للظهر… وانت قوم روح عبي السخان مي وحطوا عالبابور… ولا تسكر باب الحمام بعدين بتدوخوا من ريحة الكاز… وانت يا ست زبيدي قومي عزلي المنام… يلااا تحركوا جننتوني…
على الفطور صحن حمص وصحن فول وصحنين زيت وزعتر وصحن زيتون وجبنة بيضا مغلية وصحن زبده وخبز ساخن من الفرن وابريق الشاي الازرق وابريق حليب غنم. فطور يوم الجمعة غير…
الحمد لله يارب تديم علينا هالنعمة وتحفظها من الزوال… ان شاء الله الجمعة الجاي بكون ابوكم رجع… يلاا ارفعوا الأكل… ومين بدوا يتحمم اول واحد؟… مين؟… اه… بطلنا نسمع…!! يلاا تعال انت دورك…
يمه مشان الله انت بتحممينا كانك بتدعكي حلة نحاس خلص بنتححم لحالنا كبرنا… وتلييف في الصابون الا ثلاث مرات شو احنا مصديين؟!!
تعااال يا مصدي… والله الا تطلع بتوج وج…
لبسوا كل واحد ثوبه الابيض وطاقيته… وتعطروا…
بصراحة يمه حمامك بنزل الدموع والخشم… لكن بعد الحمام بننتعش…
يلله مع السلامة… لا تتكلموا في الجامع… ربنا يرضى عليكم.