مدونة عبد الله كريشانبحث

باصره

عبد الله حامد كريشان
رسم تعبيري لخاطرة «باصره»

اطلع يابا عالحوش شوف الفحم اذا استوى وجمر مزبوط دخلنا المنقل. وسكروا الباب كويس… وانت ياحجي شوفيلك خلقة قديمة واحشيها تحت الباب الدنيا فيها نفس صاقع… الله اعلم جايتنا ثلجة مرتبة. وهاتيلنا العشا اذا خلصتي… ولا تنسي صحن الزيتون وحطي عليه زيت من التنكة… وجيبيلي الخبزات خليني اقحمشهن عالمنقل وانا قاعد… رتب الاولاد صحون العشا على الطبلية… بعض الصحون جابوها من النملية… الجبنة والزيت والزعتر… اما قلاية البندورة مع اللحمة… الحجي بعدها بتحرك فيها عالبابور… قالت خلص يا حج استوت القلاية… والله اللحمة اللي جايبها كايفة منين جبتها؟! ظل بس اقليلكوا صحن البيض وبدي اقليه بالسمن البلدي… ريحة الخبز المقحمش فتحت نفس العيلة كلها عالاكل… يلله قولوا بسم الله… قال الحج وهو بنزل ابريق الشاي من على المنقل وبوزع الخبز على الاولاد…

الحمد لله… اللهم ديم هالنعمة واحفظها من الزوال… ياللا يا حجي ما دام تعشينا وصلينا هاتي هالشده خليني اغلبك في الباصرة زي كل مرة… ههههه…

اه بطلعلك يا حج… اصلا أنا عارفة انك بتلغمط وبتضحك علي… هذاك المرة قلتلي معك العشرة الطيبة… والجويزي… وانا صدقتك… حتى الباصرة اللي غلبتني فيها ما كانت مزبوطة… امانه عليك تعترف…

بس تعالي وصبيلي كمان كاسة شاي… رد الحج وكتافه بتهز من الضحك…

قراءة المنشور الأصلي على فيسبوك