رومنسيات كورونا

غابرييل ماركيز كتب عن الحب في زمن الكوليرا… بتعرفوها القصة… أنا كمان بدي اكتب لاني ملاحظ انه في رومنسيات كثير في زمن الحظر والكورونا، خليني اسألكم بس سؤال، لو ان واحد بتناقر… بتهاوش… مع زوجته والاثنين ماشين في الشارع وبلشت تمطر والمظلة الوحيدة مع الرجل، كيف بتصرف الرجل؟ أكيد وبدون تفكير ولا تردد بقرب على مرته وبظللها معه وبنسى المناقرة اللي بينهم كلها… مروءة… بالله عليكم كيف واحنا في هالاحوال؟ مصيبة… ووباء عام… وجائحة… الناس يا عمي لما تخاف على بعض بطلع منها أحلى ما فيها. بتطلع أطيب وأجمل المشاعر، وانا بصراحة متوقع ان الرومنسية هالايام مع كورونا والحظر مولعة عالاخر… وان المناقرات اليومية خفت أو حتى اختفت… حتى المحاكم شوفوا كيف… تقريبا سكرت، ما في الحمد لله لا فسخ ولا طلاق ولا الباب بوسع جمل… ولا بيت ابوي موجود… ولا شي من هالحكي… مش بس هيك… كمان رجعت الحيوية للبرندات والبلكونات ولليالي الأنس ولشرب القهوة على رواق… بدون يمين أنا من خمسين سنة ما شربت قهوة قد اللي شربته في هالعشرين يوم… وحتى اوتاري الصوتية حاسها تحسنت كثير، تقول شارب يانسون.، صرنا نتكلم ونسولف مع بعض. هدوووء… حب… حكمة… يا سلااام… لكن ما اقول غير الله يكون في عون المخطوبين
بعدين يا جماعة الخير… بالله عليكم مين عمره سمع واحد من الشعب عندنا بقول لو كلمة وحدة كويسة عن الحكومة؟ شوفوا الحين كيف…؟ سامعين هالغزل اليومي في الحكومة من الشعب؟ أنا بقول هذي كمان رومنسية… يا ناس أيام الشدة والاوقات الصعبة والكوارث بتطلع أحسن ما في داخل الانسان… مع كورونا انقلبت الكراهية لحب والانانية لايثار والبخل لعطاء وكل الخلافات بإذن الله انمسحت والناس سمن على عسل… وهذا بصراحة اللي بندور عليه. مع هيك الله يحمينا من كورونا ويخلصنا منها…
يا اخوان لو سمحتوا استنو شوي، مش الحين تصيبكم الحماسة مع هالحكي وتوخذكم الرومنسية… رجاءا كل واحد يحافظ على مسافة مترين بينه وبين أي واحد ثاني… مثل ما قال الوزير…