مدونة عبد الله كريشانبحث

حتى نتعافى

عبد الله حامد كريشان
رسم تعبيري لخاطرة «حتى نتعافى»

من اليوم ورايح… وبالمعاني من هانا وغاد وبالفصحى من الان فصاعدا… لازم يا اخوان نتغير… خلص ما ظل فيها… لازم نستعيذ من الشيطان ولازم من قلب نتوكل على الرحمن… لازم نصفي النية حتى مثل ما قالوا ننام في البرية… من اليوم ورايح لازم نبعد عن كل اشكال التعصب وعن الجهوية وعن الافكار الفاسدة وعن العنصرية.

لازم ننتبه ونبعد عن اللي زرعته فينا الصهيونية وغذته فينا الجهالات، لازم ننسى كمان آثار الانتخابات، من اليوم ورايح لازم ما يكون في تحاتى وكراشين وشامية المفروض الكل اخوان وأهل معانية… لازم ما يكون في حارة وكراد المفروض الكل واحد سلطية… من اليوم ورايح لازم ما يكون في شمال وجنوب الكل حبايب اردنية، من اليوم ورايح لازم ما يكون في وحدات وفيصلي ومافي شرق وغرب وما في هذا اردني وهذا بلجيكي… لازم الكل في محبة الله واحد قلب واحد وجسد واحد عيلة وحدة نسايب وقرايب…

يا ناس هذا وقت التآخي… واذا صحيح حابين نخلص من هالمصيبة وحابين فعلا نتعافى من كورونا وبلاوي كورونا هذي فرصتنا والكرة صارت في ملعبنا خلوا العالم يشوف شو حقيقة معدنا الغالي اللي دايما بنتكلم عنه وبنتباهى فيه، خلينا من اليوم وبعد التوكل على الله ما نرمي كل حملنا على الحكومة… وهذي أيام رمضان المباركة جاية بتقول للجميع يا شعبنا هذا هو وقت التآخي والتعاون، وقت التعاضد… وقت التصافي وهذا وقت المحبة اذا صحيح حابين… نتعافى…

قراءة المنشور الأصلي على فيسبوك